ICH Chrafft von Harach und all mein erben verjehen, daz wir versatzt haben unser gut daz genant ist in dem Raw^et daz unser vreys aygen ist und gelegen ist in Newnmarchter pfarr, dem erberigen gotshaus datz sant Jacob zden Neunmarcht und dem erberigen mann Walckchu^en zden zeiten zechmaister oder wer chu^enftiger zechmaister ist dez selben gotzhaus datz dem Neunmarcht umb vier pfunt und zwaintzick pfunt alter wienner pfening. Wir haben in auch daz vorgenant gu^et versatzt mit allem dem daz darzu geho^ert, und geantwu^erten in auch den vorgenanten sa^etzz auz unser nu^etz und gewer in ir nu^etz und in ir gewer mit allen nu^etzzen ern rechten und diensten alz wir ez vor gehabt haben. Ez ist auch losu^eng alle jar jerichleichen an sant Michels tag acht tag vor oder acht tag hinnach, und wenn daz ist daz daz vorgenant gotzhaus datz dem Neunmarcht oder wer chu^enftiger zechmaister ist dez selben gotzhaus des egenanten sa^etzz nicht lenger innhaben wolten, so schu^ellen si uns die losu^eng anpieten mit ainer gewizzen, und losten wir denn von in nicht in den nachsten viertzehen tagen, so habent si afften dew^e vollen gewalt daz egenant gu^et ze versetzzen und ze verchauffen umb wenig oder umb vil wem si verlu^est, und allen irn frum damit ze schaffen alz mit anderm irm aygenhafften gut mit unserm gu^etleichen willen. Wir sein auch dez egenanten sa^etzz auf dem egenanten gut ir gewer an aller stat, wo in dez not und durfft geschieicht, ta^et wir dez nicht, waz in daran abgieng mit recht wiettann schaden si dez nemen, .... (dez) schu^ellen si unz darauf phentten umb schaden und umb haubtgu^et ez si (sic) auf lant oder auf wazzer in stetten oder auf panma^erchten mit unserm gutleichen willen und schullen si dez unengolten sein gen allen herren gerichten noch chain veintschafft darumb haben von unz noch von unsern wegen. Daz dem vorgenanten gotzhaus ze sant Jacob datz dem Newnmarcht und Walckchu^en zden zeiten zechmaister oder wer chu^enftiger zechmaister ist dez selben gotzhaus di red stet und untzerprochen beleib, daruber so gib ich obgenanter Chrafft von Harach und all mein erben in den offen brief wol versigelten und bestett fu^er allen chu^enftigen chrieg mit meim anhangunden insigel, und ze ainer zew^egnu^esse pesser sicherhait versigelt mit meins lieben vettern Jansen von Harach anhangunden insigel und mit dez erberigen edel herren hern Jansen von Traw^en zder zeit hawbtman in der Vreinstat anhangunden insigel. Der brief ist gegeben do man zalt nach Christez gepu^ertt dreutzehen hundert jar und darnach in dem vier und sechtzigistem jar dez na^echsten mittichen vor sant Michels tag.

Source Fulltext: OÖUB 8 (Wien 1883), S. 189f., Nr. 186