ICH Stephan von Harach und all mein erben verjehen, daz wir versatztt haben die zehen gu^et gelegen ze Stifftung enhalb Irharo^ed in sand Lyenharder pfarr, die unser vreis aygen sind mitsamptt dem zehent grozzen und chlainem den wir dorauf haben auf allen gu^etern geleich halben zehent grozzen und chlainen. Die obgenanten gu^eter ze Stifftung alle mitsampt dem zehent hab wir versatztt mit alle deu und darzu^e geho^ert dem erbergen mann Heinrich dem Schreiber zder zeit schaffer zder Vreinstat, seiner hausvrawn Dorothen und allen iren erben fu^er ahtzik pfunt pfening wienner mu^onzz der wir ga^entzlich gewert sein. Wir haben in auch die obgenanten gu^eter alle ze Stifftung mitsambt dem zehent daselbs geantbu^ortt auz unser nutz und gewer in ir nutz und gewer mit allen den nu^etzzen diensten eren und rehten alz wir daz gehabt haben und alz si von alter hercho^emen sind, haben auch vollen gewalt die obgenanten gu^eter von in ze lo^esen in dem gegenbu^ertigem jar an sand Jo^ergen tag der schirist chu^emt umb die obgenanten ahtzik pfunt pfenning. Wa^er awer daz, daz wir an dem obgenanten sand Jo^ergen tag der schirist chu^emt von in niht enlo^esten, so sol daz obgenantt dorf ze Stifftung mit allen gu^etern die dorinn gelegen sind und auch mitsamptt dem zehent daselbs ir gechauftes gu^et sein fu^er die obgenanten ahtzik pfunt pfenning der si unz emaln gewert habent, alz oben an dem brief verschriben ist. Und wer den gegenbu^ertigen brief mit ir gu^etleihem willen innhat, der sol alle die reht an den obgenanten gu^etern und gen unz haben alz si selb mit dem brief an den gu^etern und gen unz habent. Daz in die red also sta^et beleib, doru^eber gib ich obgenanter Stephan von Harach in disen offen brief versigelt mit meinem anhangunden insigel und mit dez edeln erbergen herren hern Jansen von Traw^on zder zeit haubtman zder Vreinstat und mit meiner liben vreunt Chraften von Harach und Jann von Lozperch anhangenden insigeln. Und auch mit dez obgenanten Chraften und Jann von Lozperch gunst und willen die handlung geschehen ist. Der brief ist geben nach Christes gepu^ertt dreutzehen hundert jar und darnach in dem vier und sechtzgistem jar an sand Michahels tag.

Source Fulltext: OÖUB 8 (Wien 1883), S. 190f., Nr. 187