ICH U^elreich der Freithofer purger zw Welz Hainreichs dez Freithofer sun in der Newnstat weilen purger zw Welz dem Got gnad sa^eligen vergich, daz bier zw chawffen haben geben Fridreichen dem Czangereysen purger zw Welz und allen sein erben dew uberteurung auf dem lant zw Stawda^ech, dez do achczechen acher sind daz gelegen ist in Oftheringer pharr zw nachst Marchartz lant und zwnachst Steffans von Pu^ech, und dez auch vogt sind dew erbern herren von Chappellen, und daz auch unser rechtz freys inbertz aygen gebesen ist und da der vor benant Fridreich und sein erben unsers lieben vaters Hainreichs dez Freithofer emalln sein prief um in gehabt habent zw aym satz. Und nach dez selben priefs sag hat uns und unsern erben der obgenant Fridreich und sein erben herzwe geben nach erber lewtt rat zw aym rechten chawf ain gellt, dez bier gar und gantz von in gericht und gewert sein. Daz in di red von uns und von unser erben fu^erbaz also staet und unverchert weleib, daruber zw aym ba^ern urchund der warbait geben bier in den prief wesigellten mit dez erbern mans Fridreichs dez Chreslings zw den zeiten purgraf zw Noyczenek anhangunden insigell. Daruntter ich mich obgenanter U^elreich und all mein erben mit unser trewn verpinten, allez daz staet zwehalten daz an dem prief vor verschryben ist wan ich zder selben zeit aygens insigels nicht enhet. Der prief ist geben nach Chrysty gepu^erd uber drewtzehen hundert jar darnach in dem vier und sechtzkysten jar an sand Antony tag.

Source Fulltext: OÖUB 8 (Wien 1883), S. 162, Nr. 158