Wir Ru^odolf der vierd von Gotes gnaden erczherczog ze O^esterreich ze Steyr ze Kernden und ze Krain herr auf der Windischen March und ze Porttnaw graf ze Habspurg ze Tyrol ze Phirt und ze Kyburg marichgraf ze Purgaw und lantgraf in Elsazz verjehen fu^er uns unser bru^eder und erben, daz wier unserm getrewn lieben Hannsen dem Lazperger unserm kamermaister fu^er des pharrer gu^eter von Tyrol die wir im verlihen hetten und die er uns hat wider ledig gelassen, und umb seinen dienst den er uns yeczund diez gegenwu^erttigen krieges gen Bayrn ta^et geben und beschaiden haben zwelfhundert mark zalperna^er Merana^er mu^enzz und haben in Rudolfen seinen su^en und Kathrein Fridreichs tochter von Greiffenstain desselben seins suns eleicher hausfrawn und ier erben dafu^er geweiset auf unser herschaft und vest in Ulten, und haben in die dafu^er geseczt zu einem rechten werenden phand also, daz si und die vorgenanten ir erben von uns in phandes weise die egenant herschaft und vest in Ulten mit anderthalb hundert marken jerleicher gu^elt und mit dem gericht daselbs ze Ulten innhaben und niessen sullen an abslag der nu^ecze als lang, uncz daz wir unser bru^eder oder erben si der egenanten zwelfhundert mark meraner mu^enss ga^enczleich verrichten und geweren, was aber gu^elt und nu^ecz zu der vorgenanten herschaft und vest alle jar gevallent u^eber die vorgenanten anderthalb hundert mark und u^eber das gericht in Ulten, die sullen si uns unsern bru^edern und erben raihen und widerraitten an alles geva^erd. Auch sullen si oder wer die herschaft und vest in Ulten von iren wegen innhat uns unsern obgenanten bru^edern und erben mit derselben vest wartten und gehorsam sein uns und die unsern darin und daraus ze lassen und darinn ze enthalten als offt und des not geschiecht an iren schaden an geva^erd. und wenn wir si mit dem egenanten gelt ermanen, so sullen si uns der losung stat tu^en und gehorsam sein an all widerred und sullen das obgenant ir gelt anderswo hinder uns anlegen und ewichleich von uns unsern bru^edern und erben ze lehen haben und erkennen. Alle die weil auch wier unser egenant bru^eder und erben si des obgenanten irs geltes nicht bericht und beczalt habent, su^ellen wier si und ir erben von der obgenanten behausung und phleg in Ulten nicht entseczen noch vercheren in dhainen weg. und des ze urkunt geben wir disen brief besigelt mit unserm grozzen furstlichen insigel, der geben ist ze Enns an freitag vor sant Stephans tag als er funden ward; nach kristes gepurd drewczehenhundert jar darnach in dem vier und sechczigistem jare unsers alters in dem funf und zwainczigisten und unsers gewaltes in dem sibenden jare. Hoc est verum.

Source Fulltext: OÖUB 8 (Wien 1883), S. 184f., Nr. 181