Ich Hertneid von Wildekke vergich, daz ich verchaufft han meins rechten aygens sechs phunt und siben und achtzig phenninge wienner phenninge geltes gelegen in Wihalmspurger und in Veytinger pharren und in dem Chreuzpach auf bestiftem gut behauster holden und auf u^eberlend als hernach geschriben stet, und auf alle dem und darzu geho^eret. Des ersten im Dornech vier und sechtzig phenning geltes, an dem Adelmansperg zehen schilling gelts, auf dem Grekelperg auf dem halben hof der da bestifft ist sechs schilling geltes, an dem Ebergers lehen ein halb phunt und neun phenning geltes, Hertneid am Hasenhof ein halb phunt geltes, datz Radchaw der Herbst drei und fumftzig phenning gelts, von Mayr Hainreichs hof an der Altenburch aindlef schilling und drey phenning gelts, auf dem Chalich zwen und sechtzig phenning gelts, der Eysvogel drey schilling und vier phenning geltes, datz dem Enen ein halb phunt geltes an zwelif phenning, der Slikch von Wilhalmspurch von einem halben lehen fu^emf und zwaintzig phenning, Hertel der Fleischakcher von einem weingarten fu^emftzehen phenning, Hainreichs Chind im Ekke acht phenning von einem holtz und neunthalben phenning von einer wisen, von einem holtz im Chreuzpach sechs phenning, an der Altenburch im Frid von einer wis und von einem holtz zehen phenning, von einem wisluzz vier phenning, der Chu^enich an der Staynwant von einer pewnt acht phenninge. Die vorgeschriben sechs phunt und siben und achtzig phenning wienner mu^enzze geltes han ich recht und redleich verchaufft und geben mit allen den nu^etzen und rechten als si mir an rechter taylung gevallen sind gegen meinem pruder hern Hansen von Wildekke und als ich si in aygens gewer herpracht han umb hundert phunt und umb zway phunt wienner phenning der ich gar und gentzleich gewert bin, hern Stephann dem jungen von Hohenberch und seiner hausvrawen vrown Margreten und ir payder erben fu^erbas ledichleichen und freyleich ze haben und allen iren frumen damit ze schaffen. Und sein auch wir ich Hertneyd von Wildekke und alle mein erben unverschaidenleich der obgenanten sechs phunt und siben und achtzig phenninge geltes des egenanten hern Stephans von Hohenberch vrown Margreten seiner hausvrowen und ir payder erben recht gewern und scherm fu^er alle ansprach als aygens recht ist und des landes recht ze O^esterreich. Und daz diser chauf fu^erbas also stet und unzerbrochen beleibe, darumbe so gib ich Hertneid von Wildekke in disen brief zu einem waren urchunde und ze einer ewigen vestnunge diser sache versigelten mit meinem insigil und mit des egenanten meins pruder insigil hern Hansen von Wildekke und mit meins ohaims insigil hern Wernharts von Ladendorf und mit meins ohayms insigil hern Hainreichs von Hakenberch im an schaden. Der brief ist geben ze Wienne nach Christes gepurde dreutzehen hundert jar darnach in dem vier und sechtzgistem jar des nachsten phintztags vor sand Gyligen tage.

Source Fulltext: OÖUB 8 (Wien 1883), S. 187f., Nr. 184