Wir Ru^odofff von Gotes gnaden herczog ze O^esterreich ze Steyr ze Kernden und ze Krayn graf ze Tyrol etc. tun chu^ent offenlich mit disem brief, daz unser getrewer lieber Stephan von Hohenberch zway drittail allez dez gu^ets das er hat ze NydernHauczental und das dorffgericht daselbs mit allem dem so darczu^e geho^ert wie das genant ist daz allez von uns ze lehen ist, unserm getrewen lieben Ulreichen von Pergow seinem ayden zu^e der erbern Agnes seiner hawsfraw^en des egenanten von Hohenberch tochter mit unser hant gunst und gu^etem willen ze widerlegung versaczt hat fu^er drew hundert phunt wienner phenning also, daz der vorgenant Ulreich von Pergow dieselben gu^eter und swaz darczu^o geho^ert fu^er das egenant gelt innehaben und niezzen sol in aller der mazze, als der brief sagt den im der obgenant von Hohenberch darumb gegeben hat, doch also daz ez uns unsern pru^edern und erben an der lehenschafft chain schad sey. Mit urchund dicz briefs. Geben ze Wienn an mitichen vor gotsleichnams tag nach Christs gepu^erd drewczehen hundert jar darnach in dem vier und sechczigistem jar.||
+ Hoc est verum.+

Source Fulltext: OÖUB 8 (Wien 1883), S. 179, Nr. 174