Ich Hainreich der Prewhafen ich Kathrei sein hausfrawe und all unser erben tu^en kunt, daz ain chrieg gewesen ist zwischen uns an ainem tail und zwischen hern Stephann von Hohenberch und seinen erben an dem andern tail umb ain perchrecht ze Sighartzkirchen des zwaintzg emmer wein sein su^ellen, und umb ain perchrecht ze Pawngarten des an ainen fumftzg emmer wein sein su^ellen, und zwen ho^ef ze Holtzleiten und umb ain lehen und zwo hofstet daselbens, daz alles von unserm genedigen herren hertzog Rudolffen ze O^esterreich etc. etc. ze lehen ist und das auch von Meinharten von Wirmla und von Merten seinem sun seligen her cho^emen ist. Nu sein wier auf bayden tailn des chrieges gu^etlichen gegangen hinder di ersamen hern Weycharten von Toppel hern Nyclasen den Schekchen hern Christann den Stainer und hinder Marcharten den Tu^ersen von Tyrnstain also, was di nach irn trewn darumb zwischen uns sprechent minne und recht, daz wir das alles gentzlich stet haben wellen und su^ellen an all widerred, di habent gesprochen, daz ich egenanter Hainreich der Prewhafen ich Kathrei sein hausfraw^e und unser erben das obgenant perchrecht ze Paw^engarten und di zwen ho^ef ze Holczteytten und was darzu geho^ert su^ellen fu^erwas vreilich haben und allen unsern frumen da mit schaffen also, daz her Stephan von Hohenberch noch sein erben daran dhain recht haben su^ellen vil noch wenikch. Do engegen so habent sew gesprochen, daz her Stephan von Hohenberch und sein erben das vorgenant perchrecht ze Sighartzkirchen das lehen und di zwo hofstet ze Holczleyten und was darzu geho^eret sullen fu^erwas vreylich haben und allen iern frumen damit schaffen, also daz ich Hainreich der Prewhafen vraw Kathrei mein hausfraw^e und unser erben daran dhain recht haben su^ellen weder vil noch wenikch. Daz der spruch also stet und untzebrochen beleib, darumb so gib ich Hainreich der Prewhafen fu^er mich und fu^er mein hausfraw^en und fu^er unser erben den brief versiglt mit meinem insigel und mit des obgenanten unsers spruchmans insigel hern Nyclas den Schekchen. Geben ze sand Po^elten nach Christes gepu^erde drewtzehen hundert jar darnach in dem fu^emf und sechtzgistem jare des nachsten suntags vor sant Go^ergen tag.

Source Fulltext: OÖUB 8 (Wien 1883), S. 223f., Nr. 221