Ich Anna Mairer Otten saeligen witib von Löhen und ich Martein ir sun bechennen, daz wir uns freuntleich bericht haben mit meiner lieben swiger meines su^ens anen fraw^en Maechilden der Mairer O^ettinn ze Lohen umb die zwelff phunt münicher phenning zwen gu^et haller fur ainen phenning die wir enphangen und ingenomen haben von Ulreichen dem Greyffen und seinem pru^eder umb daz aygen ze Hard also mit der beschaiden, daz wir die vorgenanten phenning inne haben und niezzen sullen und unsern früm damit ze schaffen als mit anderm unserm aigen gu^et also mit der beschaiden, daz wir der egenanten Maechilden Mairer Otten witib von Löhen jaerchleich davon geben sullen ir lebtag auf sand Marteins tag newen schilling phenning zwen gu^et haller fu^er einen phenning ze dinst von den zwelff phunden viertzehen tag vor oder hinnach an gevaer. Taeten wir dez nicht so sullen wir der egenanten Maechilden geben ainen halben mutt roggen und ainen halben mutt habern darnach in den nachsten viertzehen tagen, und darumb zu^e einer bezzern sicher heit haben wir ir zu^e sampt uns versetzt den erbern weisen herrn hern Hansen den Schonsteter ze porigen also mit der beschaiden, wann daz waer daz wir sei nicht richteten dez vorgenanten draitz auf die egenanten zeit, wan si dann den egenanten herren Hansen von Schonstet mont so sol er ir gen Wazzerburch legen in ein offens gasthaus einen erbern chneht mit einem pfaerst, und der sol da laisten so lang untz daz si irer traitz gericht wirt, und darzu haben wir der egenanten Maechilden daz bestaet auf unserm zehent ze Perig mit herren Hansen von Schonsteten hant da der selb zehent lehen von ist ir lebtag, und nach irem tod so ist uns der zehent wider ledig und lös an alle widerred daz dhain ir erb nicht darnach ze sprechen sol haben, auch ist ze wizzen daz die egenant Maechild von den zwelff phunt phenning durich irr sei hailes willen wol schaffen und geben mag dreu phunt phenning wem si wil, waer auch daz ich obgenante Anna und Martein mein sun abgiengen und nicht enwaern, so süllen newn phunt phenning wider erben auf Maechilden die Mairer Ottin von Löhen und auf ir naechst erben. Daz ir daz staet und unzerbrochen beleib geben wir ir disen brief mit herren Hansen dez Schönsteter insigel besigelt, darunder wir uns mit unsern trewen verbinten staet ze haben daz oben an disem brief stat geschriben. Dez sind zeugen Chunrad Türndel Ludweig Pu^ebinger Fridreich und Ha^ensel die Pu^ebinger Peter der Schreyber und ander erber lau^et genu^ech. Daz ist geschehen nach Christes geburt dreutzehen hundert jar darnach in dem fumf und sechtzigisten jar an sand Oswaltz tag.

Source Fulltext: OÖUB 8 (Wien 1883), S. 242f., Nr. 240