Wir Rudolf der vierd von Gotes gnaden erczherczog ze Osterreich ze Steyr ze Ka^ernden und ze Krain herr auf der Windischen Marich und ze Porttnaw graf ze Habspurg ze Tyrol ze Phirtt und ze Kyburg marichgraf ze Burgaw und lantgraf in Elsazz bekennen und tun kunt offenleich mit disem briefe, als wir vormals von sundern gnaden und durch getrewes dienstes willen geben haben unserm lieben getrewn Johansen von Lazperg unserm kamermaister tausend mark zalperna^er gu^eter und geber meraner munsse ze rechtem heyratgut Rudolfen dem Lazperga^er seinem sune, dafu^er wir in baiden und iren erben versaczt haben unser vest und herschaft leute gu^eter und gericht in Ulten und was darczu^e geho^ert darumb wir in vormals unsern brief gegeben haben, daz wir dem vorgenanten Johannsen von Lazperg daru^eber noch fu^erbaser schuldig sein und gelten sullen vierhundert mark zalperna^er der egenanten mu^ensse umb den dienst, den er uns verd gen Bayrn mit sechs und dreyssig helmen und als manigem schu^eczen und hewr gen Fryawl mit vier und zwainczig helmen und als manigem schu^eczen getan hat, und dieselben vierhundert mark slahen wir im und dem egenanten seinem sune und allen iren erben auf den vorgenanten sacz ze Ulten zu den vorgenanten tausent marken di si vormals darauf habent also, daz si die obgenanten unser vest leute gericht und gu^eter in Ulten mit allen nuczen freihaiten rechten wirden eren und guten gewonhaiten di darczu^e gehorent, wa die gelegen und wie si genant sind innhaben besiczen oder beseczen und niessen sullen ru^ewikleich in ains rechten werenden phandes weise ane allen abslag der nu^ecz als lang, uncz daz wier oder unser bru^eder oder unser erben sey von in mit tausent und vierhundert marken der egenanten mu^enzze erledigen und erlo^esen, derselben losung auch si uns stat tu^en und gehorsam sein su^ellent ane allen aufschub und widerrede, wenne wir die in dem namen als da vor geschriben stet an si vordern ane alles geva^er. Auch sullen si uns die egenant vest offen haben zu allen unsern sachen und notdurften, uns und die unsern darin und daraus ze lazzen und darinn zu enthalten wider allerma^enikleich nyemann ausgenomen als ofte uns des not beschiecht an alles gever, wenne auch die erber unser getrewe Hailweig die Schenkchin von Ulten abstirbet, so sullen die vierczig mark geltes die si daselbs ze leibgeding hat und neuzzet auch gevallen gar und ga^enczleichen den egenanten Lazpergern in den vorgenanten sacz also, daz es alles ain phand sey uncz daz wier die losung getu^en als vorgeschriben stet. Mit urkunt dicz briefs versigelt mit unserm grossen fu^erstleichen insigel, der geben ist ze Maylan an samstag nach sant U^elreichs tag nach Krists geburde drewczehen hundert jar und darnach in dem fu^emf und sechczigisten jare unsers alters in dem sechs und zwainczigistem und unsers gewaltes in dem sibenden jaren.||
Hoc est verum.

Source Fulltext: OÖUB 8 (Wien 1883), S. 240f., Nr. 238