ICH Stephan von Harach und all mein erben verjehen, daz wir versatztt haben unser gu^et ze Prehtleinslag, da zder zeit Chu^enrad der Chiendel aufgesezzen ist daz vreys aygen ist, und ain gu^et gelegen im Pehaimdorff zeuachst Dietlein da zder zeit Elspet Petreins sa^eligen hausvrawe aufgesezzen ist daz auch vreis aygen ist, und die gu^eter paider gelegen sind in Reyhentaler pfarr, und ein gu^et im Chu^engshlag gelegen zenachst dez Waltpurger hof da zder zeit Dietreich aufgesezzen ist daz auch vreys aygen ist und gelegen ist in Schenchenvelder pf'arr. Die vorgenauten dreu gu^eter hab wir versatztt mit alle deu und darzu^e geho^ert. Darzu^e hab wir versatztt den zehent der gelegen ist auf dem obgenanteu unserm gu^et ze Prehtleinslag, und den zehent der gelegen ist auf dem O^edreut daselbs daz in dez Waltpurger hof geho^ert da wir paidenthalb haben zwai tail zehentz chlainen und grozzen. Daz hab wir allez versatztt dem erbergen chnehtt Heinrichen dem Schreiber zder zeit schaffer zder Vreinstat seiner hausvrawn Dorothen und allen iren erben fu^er viertzik pfunt pfenning alter wienner mu^enzz der wir ga^entzlich gewert sein. Wir haben auch vollen gewalt die gu^eter von in ze losen in dem gegenbu^ertigem jar an sand Merteins tag der schirist chumt umb die obgenanten viertzik pfunt pfenning. Wa^er awer daz daz wir an dem obgenanten zehent ir gechauftz gu^et sein fu^er die egenanten viertzig pfunt pfenning, der si unz emaln gewert habent alz oben an dem brief verschriben ist, und schu^ellen si damit schaffen allen iren frum mit versetzzen oder mit verchauffen, schaffen oder geben, wem si wellen, und schu^ell wir sen noch all unser erben doran nihtz irren noch hindern. Und wer den gegenbu^ertigen brief mit ir gu^etleihem willen innhat, der sol alle die reht an den obgenanten gu^etern und gen unz haben alz si selb mit dem brief an den gu^etern und gen unz habent. Daz in die red also stet beleib daru^eber gib ich obgenanter Stephan von Harach in disen offen brief versigelt mit meinem anhangunden insigel und mit dez edeln herren hern Jansen von Trawn zder zeit haubtman zder Vreinstat und mit meins lieben vetter Chraften von Harach und Otten dez Feurter zder zeit lantrihter in der Riedmarch anhangunden insigeln und auch mit dez obgenanten Chraften gunst und willen die handlung geschehen ist. Der brief ist geben nach Christes gepu^ertt drewtzehen hundert jar darnach in dem fu^emf und sechtzgistem jar an sand Peter und sand Pauls tag.

Source Fulltext: OÖUB 8 (Wien 1883), S. 239f., Nr. 237