Ich Hainreich der Gneusse ze den czeitn gesezzen ze Ort und ich Kathrey sein hausvrow und all unser erbn wir verjehen, daz wir mit aller unser nesten vreunt willen und gunst und erhn und mit unsers rechten lehenhern hant des hochgeporn heren graff Ulreichs von Schawnberch recht und redleich verchauft haben unsers rechten lehens sechczig emmer weins perchrechcz, daz gelegen ist an dem Sunperg und an dem Peczlertal pey U^etental mit alln nüczen und rechten die darczu gehörent als unser vodern und auch wir die selbn sechczig emmer weins perchrechez in lehens gewer herpracht haben, umb ains und fünfczig phunt wienner phenning der wir gar und genczleich gewert sein den erbn lewten Hainreichen von Jedendorff und Niclasen des Fridreichen von Hunczhaim und iren erbn fürbas ledichleich und vreyleich ze haben und alln iren frumen damit schaffen verchauffen mit versetzen und geben wem si welln an all irrsal, und sein auch wir ich obgenanter Hainreich der Gneisse und ich Kathrey sein hausvrow und unser erben unverschaidenleich an den obgenanten sechczig emmer weins perchrechcz Hainreichs von Jedendorff und Niclas des Fridreichs und ir erben recht gewern und scherm für all ansprach als lehensrecht ist in dem land cze O^esterreich. Und daz diser chauff fürbaz also stet und unczebrochen beleibe, daruber so geben wir in den brif zu eym waren geczeug der sach versigelten mit meins oft genanten Hainreichs des Gneusse insigel. der sach sint auch geczeugen meine schwecher Hainreich der Durstal und Steffan der Mitterberger igleich mit seinem insigl. Der brif ist geben nach Christi gepurde dreuczehen hundert jar darnach im fünf und sechezigisten jar an sand Peter nellen tag.

Source Fulltext: OÖUB 8 (Wien 1883), S. 233f., Nr. 229