Wir Albrecht von Gotes gnaden herczog ze O^esterreich ze Steyr ze Kernden und ze Krain graf ze Tyrol etc. tu^on chunt, daz wir angesehen haben die manigvaltigen und emczigen dienste die unser lieber getrewr Eberhart von Kappell unsern vordern und ouch uns ze manigem male erczaigt und getan bat und noch fu^erbaz wol getu^en mag und sol, und haben im und seinem vettern Eberhartem dem yungen von Kappel Ulreichs seligen sun von Kapell seins bruders von sundern gnaden gegunnet und erloubet haben gu^ennen und erlouben ouch mit disem briefe, daz si auf dem perg und dem purchstal ze Valkchenberg ein vest gepaw^en mugen ane menchliches irrung und hindernuzze. Und sullen ouch danne si und alle ire erben, su^enc und töchter dieselben veste mitsampt dem perg und dem purchstal ze Valkenberg fu^erbaz ewichlich von unserm lieben bru^oder herczog Leupolten und von unsern erben ze rechtem lehen haben und bechennen und die in lehens weise von uns innehaben und besiczen alz lehens und landes recht ist. Davon gepietten wir unsern lieben getrewn allen unsern houbtleuten lantherren rittern und knechten und allen andern unsern undertanen den der brief geczaigt wirdt und wellen gar ernstlich, daz si den obgenanten von Kappell und iren erben an dem paw^ee der vorgenanten vesten chain irrung tun in dheinen weg und si dabei beleiben lazzen, wan wir in das erloubet haben in der weise alz vorgeschriben stet. Mit urchund dicz briefs geben ze Lincz an phincztag vor sand Michels tag nach Kristes gepurde dreuczehenhundert jar darnach in dem acht und sechczigistem jare. Dominus dux. Com. Ulricus de Schow^enberg Magister curie de Liechtenstain et magister camere Wehinger.

Source Fulltext: OÖUB 8 (Wien 1883), S. 395f., Nr. 399