Wier Albrecht von Gotes gnaden herczog ze O^esterreich ze Steyr ze Kernden und ze Krain graf ze Tyrol etc. tu^on chunt, daz wir dem edeln unserm lieben o^ehem graf U^elrich von Schownberg gelobt und verhaizzen haben, swaz er in dem dienste den er uns ze disem mal wider di von Bayrn tu^on sol mit zwaynhundert helmen und mit zwaynhundert schu^eczen an rossen und an hengsten auf dem velde schaden nimet der redlich und wizzentlich ist, daz wir im denselben schaden ablegen sullen und wellen nach dem gewonlichen anslag der geschehen ist bei unserm lieben herren und vatter herczog Albrechten und darnach bei unserm lieben bru^oder herczog Rudolfen seliger gedechtnu^esse und als wir andern unsern herren rittern und knechten tu^on mit urchund dicz briefs. Geben ze Lincz an samztag nach Michahelis anno domini M°. ccc° Lxviij°. (millesimo trecentesimo sexagesimo octavo).

Source Fulltext: OÖUB 8 (Wien 1883), S. 396f., Nr. 400