Wir Albrecht von Gotes gnaden herczog ze O^esterreich ze Steyr ze Kernden und ze Krain graf ze Tyrol etc. tu^en kunt, daz uns unser lieben getrew^en Fridreich und Hainrich von Walsse von Drosendorf bru^eder mit iren versigelten briefen aufgesant habent alle die lehen und gu^eter die si ze lehen von uns gehabt habent und die zu der herschaft ze Valchenberg geho^erent, und paten uns diemu^etichlich und fleizzichlich daz wir dieselben gu^eter verlihen unsern getrewn lieben Eberharten von Kappell dem eltern und Eberharten von Kappell dem yungern seinem vettern wan si in die ze chouffen geben hetten. Das haben wir getan und haben denselben von Kappell und iren erben su^enen und to^echtern von sundern gnaden die vorgenanten lehen und gu^eter die zu Valkenberg geho^erent verlihen, und leihen ouch swas wir in ze recht daran leihen sullen fu^erbaz von uns unserm lieben bru^eder herczog Leupolten und unsern erben in lehens weise inne ze haben und ze niezzen alz lehens und landes recht ist, und sein ouch wir daru^eber ir scherm vor gewalt und vor unrecht. Mit urchund dicz brief geben ze Wienn an eritag nach sand Marteins tag nach Kristes gepu^erde dreuczehenhundert jar darnach in dem acht und sechczigisten jare.||
Magister Curie Liechtenstein et magister camere Wehinger.

Source Fulltext: OÖUB 8 (Wien 1883), S. 398f., Nr. 403