ICH Dyetreich der Weydner und ich Margret sein hausfrawe ich Albrecht ich Hainreich paid pru^eder Albrechts sun dez Vydorfer und mit uns all unser vorgenanten erben verjehen, daz wier all mit einander haben ze chauffen geben dem edlen herren hern Ru^odolfen von Waltse ze Seuseneke sein geswistreten und allen ieren erben unsers freyen aygens den hoff daz der Neunstat und daz purchstal genant Planchenek und alle di gu^eter di mit nam hernach geschriben stent: di hofstat dez Sneyder di hofstat an dem O^ert di hofstat pei dem Prun di hofstat an dem Ernek di hofstat ze nachst pei dem hoff di hofstat am O^ert pei dem Phanhoff di hofstat der Nu^ezzerlin dez Schu^echster hofstat dez Geyerleins hofstat; darzu^e di zwo hofstat auff der stetten schullen sev stifften und storen und von igleich ze dienst haben fu^er erum und fu^er tagwereh sybenzehen phenning: sev habent auch ze stifften und ze sto^eren di witiben an dem O^ert, di dient zwelf fu^er erum und sybenzehen für tagwerch; auch von drin fleychzpenchen sechs phunt unslid dienst und auch alle voktay zu der Neunstat auf allen gu^etern. Daz allez hab wir in geben umb ein gelt dez uns gar von in genu^egt hat und dez wir gancz von in gewert sein ze rechten tegen an allen schaden also beschaidenleich, daz sev daz obgeschriben allecz inn schullen haben und niezzen mit allen den eren rechten und nuczzen und darczu^e gehorent, recht alz wierz in aygens gwer herpracht haben, und seczen sev dez auch an nucz und an di gewer auz der unsern in di ieren also, daz sev fu^erbaz allen iren frum da mit mugen schaffen wo iz in allerpest fu^egt verseczzen verchauffen geben swem sev wellen, und schull auch wir hinfu^er darauff chain ansprach nicht haben noch gewinnen clain noch vil; darczu secz wier uns des obgenanten chauffs allecz in ze scherm und ze gwer fu^er alle ansprach, wo in dez du^erft geschicht, also aygens recht ist in dem land. Daz in daz allecz stet beleib darumb geb wier vorgenant Weydner Albrecht Hainreich Vydorfer den obgenanten hern Ru^odolfen sein geswistreten und iren erben den offen prief ze urchund der warhait versigelten mit unser aller anhangunden insygelen. Und ich egenante Margret Dyetreichs dez Weydner hausfrawe verpint mich auch mit mein treuen hinder meins lieben wierts und hinder meiner nachsten freunt Albrechts und Hainreichs der Vydorfer anhangunden insygel daz obgeschriben allecz mit sampt in stet ze haben wand ich aygens insygel nicht han. Der sache sind zeugen der erber ritter her Atacher der Wolfstain, unser vater Albrecht der Vydorfer Ulreich der Reycherstorfer Eberhart der Chuenast auch mit iren anhangunden insygeln. Der prief ist geben do man zalt von Christes gepu^erd dreuzehen hundert jar darnach in dem neu^en und sechzichsten jar dez suntags nach aller mann vasschang tag.

Source Fulltext: OÖUB 8 (Wien 1883), S. 409f., Nr. 413