Wir Albrecht von Gots gnaden hertzog ze Osterreich ze Steyr ze Kernden und ze Chrayn graf ze Tyrol etc. bechennen und tu^on chunt offenlich mit disem brief, wan wir wol und aigenlich beweiset sein daz unser stat ze Lyntz an turnen an mauren an graben und an andern werlichen pawn bey langen zeiten her gro^ezzlich abgenomen und zergangen si, so verre der ir churtzlich nicht ze helffe kome (sic) daz denne dasselb paw gar zu^or ge und nider gelig, und wan das uns land und leuten gar schedlich were darnach als dieselb unser stat an unsern gemerken gelegen ist, dar umb nach gu^oter vorbetrachtung und zeitigem rate unsers rates haben wir den purgern derselben unsrer stat gegunnen und erlaubt gunnen und erlouben ouch mit fu^erstlicher macht, daz si daselbs ze Lyntz ain zoll haben und auffnemen mugen auff wasser und auff lande in solicher mazze als hienach beschaiden ist, von yedem fu^oder weins zwelif phenning von dem dreyling weins acht phenning von aim mutt korns zwen phenning und von yedem ross zwen wyenner phenning, und sullen denselben zoll da haben innemen und vessen untz an unser oder unsers lieben bruders hertzog Leuppolts widerru^effen. Was ouch davon gevellet daz sullen si mit ainer gu^oten chuntschaft unsers houptmans ob der Ens wer der ye zu^e den zeiten ist anlegen und becheren zu^e dem paw der egenanten unsrer stat an turne an graben an mauren und an ander werlich paw da es aller notdurftigest ist ane gever. Darumb gepieten wir unserm houptman ob der Ens und allen . . . und wellen, daz si die vorgenanten unser purger bey dem egenanten zoll beleiben lazzen in aller der mazze als vor geschriben stet alle die weil wir oder unser vorgenanter bru^oder das nicht widerru^eft haben. Mit urchund ditz briefs, geben ze Wyenn an sant Peters und sant Pauls abent der heiligen zwelfpotten nach Christs gepurt dreutzehen hundert jar darnach in dem neun und sechtzigisten jare. Dominus dux, comes de Schawn berg, m(agister) curie de Topel marscalcus provincialis et We hinger magister camere.

Source Fulltext: OÖUB 8 (Wien 1883), S. 422f., Nr. 428