Ich Peter der Preuhaven und ich Anna sein hawsfraw und mit sampt uns alle unser erben wie die genannt sind wir vergehen, daz wir zder zeit und wir ez mit recht wol getu^en mochten und ez nimant widersprechen mocht noch widersprach ze chauffen haben geben unser gu^eter a^echtew die mit namen hernach an dem prief geschriben stend, dez ersten den hof in der Rawming gelegen der der Albrechtsperg genant ist, desselben hofs zwai gu^eter sind und ain o^ede die dazu^e gehört und ainen pawmgarten der daselbigs gelegen ist, und ain gu^et an dem Wolfslehen genant und ain o^ede die zu^e demselben gu^et geho^ert, und ain gu^et an dem Raw^etterlehen genant, diselben gu^eter alle gelegen sind in der pharre ze Pechaimperg hinderhalben der Rawming und vreyes aigen sind. — und ain gu^et ze Hulbarn gelegen da zden zeiten der Schewber aufgesezzen ist, und ain gu^et dacz Chawnperg genant, diselben zwai gu^eter in der pharre ze Sy^erdnich gelegen sind, und zwei gu^eter ze Gemprechtsperg genant in Tu^edecher pharre gelegen, diselben vir gu^eter all inbertaigen sind gen Steyr in die pu^erch, dem erbern manne Chunraden dem Perausch bu^erger ze Steyr seiner hawsfrawen und allen iren erben aws unser nucze und gewer in ir nucze und gewer mit alln den eren rechten als wir dieselben gu^eter wir und unser vorvordern herpracht und gehabt haben in nucze und in gewer, und haben in auch dieselbn gu^eter gegeben umb ain gelt dez si uns schon aller sache genczleich und gar gericht und gewert haben also beschaidenleich, daz wir noch all unser erben hincz denselben gu^etern nimmer mer dhainen zu^espruch noch ansprach schullen haben. wir schullen und wellen auch der obgenanten guter ir rechter gewer sein fu^er all ansprach, wo in dez no^et und durft geschiecht nach lantzrecht als vreyer aigen und inbert aigen recht ist in dem land ze Oesterreich. Daz die rede fu^erbas sta^et und unverchert beleib darüber gib ich Peter der Preuhaven Chunraden dem Perawsch und seinen erben den prief fu^er mich und all mein erben zu^e ainem waren urchund der warhait versigelten mit meinem anhangunden insigel, und mit meins swager hern Hansen dez Doczenpekchen und mit meins swager Hainreichs dez Schekchen anhangunden insigiln, und zu^e ainer gu^eten geczewgnu^ezze mit des erbern ritter hern Stephanns dez Schekchen zden zeiten purggraf ze Steyr anhangunden insigil. Geben nach Christi gepu^erde über drewczehen hundert jar darnach in dem ains und sibenczgisten jar an dem pluem osterabent.

Source Fulltext: OÖUB 8 (Wien 1883), S. 520f., Nr. 525