Wir Albrecht von Gotes genaden herczog ze O^esterreich ze Steir ze Kernden und ze Krain graf ze Tyrol etc. tun kund umb die gu^eter gelegen umb Ulreichskirchen umb den achtail der vesten ze Pilichdorf und seiner zugeho^erung und umb den tail des hawss ze Newsidel auch mit aller seiner zu^egeho^erung, die unsern juden David Steuzzen von Wienn Kysanen Judmans kinder der Pa^eltlinn und etleichen andern unsern juden gestanden sind von Wolfgangen und Hannsen gebru^edern den Stra^ewen, der ain tail von uns ze lehen sind und ain tayl aygen ist. Dieselben guter die egenanten Stra^ewn und auch die juden unsern getrewn lieben Wolfgern Ulreichen und Hannsen von Dachspergk gebrudern verchaufft habent als die kauffbrief wol weisent die darüber gegeben sind, daz darumb vor unser gewesen sind der egenant Wolfgang der Stra^ewn an seiner und seines bru^eder stat und auch die juden und habent uns dieselben gu^eter auf¬gegeben und habent uns gebeten, was derselben gu^eter von uns lehen sind daz wir die von des kauffes wegen lichen den egenanten von Dachsperg, das haben wir getan und haben in und irn erben die gelichen und leichen auch was wir in durch recht daran leichen sullen oder mu^egen, von uns unserm lieben bru^oder herczog Leuppolten und von unsern erben innczehaben und ze niessen als lehens und lanndes recht ist. Und wellen auch wir der vorgeschriben gekaufften gu^eter aller die lehen sind fur lehen, und der aygen fu^er aygen ir gewer und scherm vor gewalt und vor unrecht als unsers lanndes ze O^esterreich recht ist. Mit urkunt dicz briefs. Geben ze Wienn an raontag nach sant Laurentzentag nach Krists gepurd dreuczehenhundert jar darnach in dem ain und subenczigisten jar.

Source Fulltext: OÖUB 8 (Wien 1883), S. 538f., Nr. 543