ICH Thoman der Swantter purger czder Vreinstat und mein hausvraw^e und alle unser payder erben und ich Dyetrich der Pestel purger zder Vreinstat und ich Dorothea sein hausvraw^e dez vorgenanten Thoman dez Swantter tochter und alle unser payder erben verjehen, daz wir recht und redlichen mit gesampter hant und auch mit herren hant verchauff haben unser zehent halben die zwaitayl chlain und gross die wir haben auz dem selben zehent, der gelegen ist in den zwain purchvelden zder Vreinstat, in dem veld gen sand Peter und in dem veld gen Vierczehen und auch auf peunden und auf gertten die gelegen sint pei der Vreinstat und auch in den vorgenanten halben zehent gehornd, und dar zu auf dem dorfflein dacz sand Peter pei der Vreinstat und da pei auf dem Maierhoff und da pei auf dem Widemhoff und dar zu auf allen den lu^essen die in die vorgenanten sand Peters pfarr geho^ernd ze Sunnberch ze Lanbach dacz den Dreizken und dacz den Vierczehen und auch auf den guttern die mit namen her nach geschrieben stent, von erst auf dem hoff genant Gelbrechshoffen und auf den lehen daz in den selben hoff gehornd, und auf den payden Jaurniczzen und auf dem gut dacz Porcz und in dem veld dacz Pu^ezlingen under dem weg und dacz Ruetharczlehen under dem weg und auf dem do^erfflein . . dacz der nidern Swant und auf dem gut dacz Lengnaw^e und auf dem gut dacz Ru^emla^e und dacz dem Staincherll und auf dem gut dacz Hinderlehen, und da man aller ja^erlichen von dient von dem selben halben zehenten vor auz zweliff schilling alter wienner pfenning und drei meczzen gersten an sand Michels tag in daz spital den armen du^erftigen dacz unser vraw^en zder Vreinstat und der lehen ist von dem edeln fu^ersten pyschoff Albrechten ze Pazzaw, dem erbern mann unserm lieben freund Chunrat dem Pestleins purger zder Vreinstat und seiner hausvraw^en Kathrein und allen ir payder erben umb ain gelt dez wir gancz und gar zu rechten ta^egen gericht und gewert sein an alle schaden. Wir haben in auch den vorgenanten unsern zehent halben verchaufft mit allen den nu^eczzen ern rechten und diensten und haben in den richtig gemacht und auf gegeben mit dez obgenanten edeln fursten hant pyschoff Albrechten ze Pazzaw von dann er lehen ist. Daz dem vorgenanten Chunrat dem Pestlein und seiner hausvraw^en Kathrein und allen ir payder erben die red also sta^ett und unczerprochen beleib, dar uber so gib ich obgenanter Thoman der Swantter und alle mein erben und ich obgenanter Dyetrich der Pestel und alle mein erben in den offenn brief versigelt mit unsern anhangunden insigeln, und zu ainer zeugnusse pesser sicherhait versigelt mit dez erbern mans Symons dez Ermans zder zeit statrichter zder Vreinstat anhangunden insigel. Der brief ist geben da man czalt nach Christes gepu^ertt dreuczehen hundert jar und dar nach in dem zwai und sybenczikistem jar an sand Jo^ergen tag.

Source Fulltext: OÖUB 8 (Wien 1883), S. 586f., Nr. 584