Wir graff Ulreich von Schawmberch haubtpman ob der Ens bechenn offenleichen an diesem prieff, daz wier uns mit unsern trewen an aydestat verlobt und verpunden haben gegen unserm lieben herren herczog Albrechten in Osterreich in Steir und in Kernten graff cze Tyrol etc. also umb die pu^entnu^ezze die er mein egenanter herr herczog Albrecht und mein herr herczog Leutpolt zue paiderseit mit einander pruederleichen und vreuntleichen getan habent, ob daz wer daz der egenant mein herr herczog Lewtpolt meinem herren herczog Albrechten pey derselben pu^enntnu^ezze nicht peleiben wolt lazzen und wolt in dringen daz wider in wa^er und wider lantt und wider lewtt wer, und wolt in da pey nicht peleiben lazzen als alle weg die elteren fu^ersten von Osterreich her chomen sind und als ir punntprief sagent also, daz wir dann mit unserm herren herczog Albrechten und mit lant und mit lewten stetichleichen und genczleichen peleiben schullen und auch wellen und dem vorgenanten unserm lieben herren herczog Albrechten geholffen sein mit allein unserm vermu^egen und in dar inn nicht ze lazzen in dhain wegen an alles gever, wenn er uns dar umb ermanet wider seinen vorgenanten pruder meinen herren herczog Leuppolten und wider alle sein helffer. Und wa^er auch sach daz unserm vargenanten herren herczog Albrechten der nott geschech des Go^et nicht engeb, daz er uns manund wurd also, daz wir im ze dinst wu^erden wider seinen prueder und wider sein helffer als var geschriben stet, so schol er uns auch versargen umb unser chost und dienst und scheden nach dreirr seins rates die wier darczue vadern, und wazz die dar umb sprechent da schol es pey peleiben und schul uns auch genczleichen unser vargenanter her herczog Albrecht darumb ausrichten unverczogenleichen an alles gever. Und wer auch daz wir den chrieg angriffen, so schol sich unser vorgenanter herr herczog Albrecht mit seinem prueder nicht richten noch mit seinen helffern an uns noch an unser vreunt und helffer an alles gever. Mit urchund dicz priefs pesigelt mit unserm anhangunden insigel, der geben ist nach Christes gepu^erd drewczechenhundert jar darnach in dem zway und sibenczigisten jar an sand Georgen tag.

Source Fulltext: OÖUB 8 (Wien 1883), S. 584f., Nr. 583