Wir Stephann der junger von Gotez gnaden pfalczgraf bey Reyn und herczog in Bayern etc. bechennen offenlich mit dem brief umb den sacz, alz der wolgeborn unserr sunder frewnt graf Ulrich von Schawnberg von uns inne hat unsere veste Wildnek und dez zolles ze Straswalhen, wer uns mit denselben sacz briefen die er von uns hat ermant, daz der alle die recht haben sol und hat alz der obgenant graf Ulrich und sein erben, und sein im auch aller glub und artikelen schuldig und gepunden. mit urkund dez briefs den wir darüber geben versigelten mit unserm insigel. Geben ze Schawnberg an mitichen vor sand Gallen tag anno domini millesimo trecentesimo septuagesimo secundo.

Source Fulltext: OÖUB 8 (Wien 1883), S. 615, Nr. 614