Ich Thoman der Apfentaler mein hausfraw und alle unser erben ich Anna und ich Elsbet hern Jacoben dcz Elreichinger töchter dem Got gnad verjehen, daz wir verchauft und ze chaufen geben haben dem erbern Otten dem Stu^eckchler purger ze Obernperg seiner hausfrawn und allen iren erben unser gut gelegen in dem Weyntal da di zeit Friedreich in dem Weintal aufgesezzen ist und das Steffanisch aigen ist und das auch vorgenanten Annen und Elsbeten von unsern vorgenanten vater hern Jacoben dem Elreichinger saligen anerstorben ist mit allen den eren rechten und nützen di dazu gehorent umb etleich gelt dez wir gantz und gar von in bericht und gewert sein, und haben auch im dasselb guet ingeantwurt mit probtz hant und mit aller der stat di darzue gehort. Daz der chauf und die handlung furbaz also sta^et und untzerbrochen beleib daruber ze ainem waren sichtigen urchund der sach geben wir in den brief versigelt mit meinem vorgenanten Thoman dez Apfentaler anhangunden insigel, und mit des ersamen Hansen des Tuemmairs insigel di zeit probst und chastner ze Obernperg. darunder wir uns ich vorgenanter Thoman der Apfentaler mit sambt meiner hawsfrawn und ich vorgenante Anna und ich Elsbet mit sambt allen unsern erben uns unverschaidenleich verpinden mit unsern trewn an allez gever allez daz sta^et ze haben und ze volfuren daz an dem brief geschriben stet. Und wer auch den brief mit irem guetleichem willen inn hat oder furpringt der hat alle di recht di hie vorgeschriben stent alz ga^entzleich alz si selber. Der geben ist do man zalt nach Christes gepurt dreutzehen hundert jar darnach in dem vier und sibentzgisten jar an unser frawen abent zue der chu^endung.

Source Fulltext: OÖUB 8 (Wien 1883), S. 689, Nr. 681