Ich Wernhart der Druchsaetz von Reichestorf vergich, daz ich gegeben han meinem aydem hern Stephann dem Schekchen zu seiner housvrowen Chunigunden meiner tochter fu^er zway hundert phunt und fur czwainczig phunt phenning wienner mu^enzze ze rechter haimstew^er nach des lanndes recht ze O^esterreich meinen hof gelegen ze Rueppolting auf dem Tullnervelde bei dem Siczenperg, und alles daz das darczue gehoret das alles purchrecht ist von dem bischof ze Saltzpu^erch dem man alle jar davon dient in den ampthof ze Traismmawr newn schilling an vier phening wienner munzze an sand Michels tag ze purchrecht und nicht mer, und mein zcwen lehentail in dem werd die purchrecht sint von den grafen von Maydbu^erch den man alle jar davon dient viertzig wienner phening an sand Michels tag ze purchrecht und nicht mer, und ayn phunt und vier und zwainczig phening wienner munzze geltes gelegen auf czwain weingarten die do ligent bey Traysenma . . . . ainer an dem Topel des drew viertail sint, und der ander an dem Stolhoferperg des ein halbs jeuch ist die zu den czeiten Wo^elfel der Choch von Stolhofen paiden . . . . die vorgenanten gu^eter allew han ich dem egenanten meinem aidem hern Stephann dem Schekchen fu^er die obgenanten czwayhundert und zwaintzich phunt recht und redleich gegeben ze rechter haimstewr nach des lanndes recht ze O^esterreich mit allen den nu^eczen und rechten, als ich dieselben gu^eter in purchrechts gewer herpracht han also mit ausgenomener red, ist das die vorgenant Chunigunt mein tochter mit dem egenanten ierm wirt hern Stephann dem Schekchen chind gewinnet, darauf sullen denne nach ir paider tod die vorgenanten gu^eter erben und gevallen; wer aber das dieselb Chu^enigunt mein tochter abgieng mit dem tod ee denne der vorgenant ir wiert her Stephann der Schekch und daz di miteinander nicht chind gewunnen das Got nicht welle, oder ob si chinde miteinander gewunnen und daz die ouch abgiengen ee denne derselb her Stephan der Schekch mein aidem, dennoch so sol er die vorgenanten gu^eter allew in nucz und in gewer innehaben unverchumert uncz an seinen tod als haimstew^er recht ist und des lanndes recht ze O^esterreich, und donne nach seinem tod so sullen die vorgenanten gu^eter allew herwider gevallen auf mich egenanten Wernharten dem Druchsetzen oder ob ich nicht wer, darnach auf mein nachst erben darauf si denne zerecht erben und gevallen sullen an allen chrieg, und pin ouch ich und all mein erben unverschaidenleich der vorgeschriben guter aller des egenanten meins aydems hern Stephans des Schekchen recht gewern und scherm fur alle ansprach als purchrechts und haimstew^er recht ist und des lanndes recht ze O^esterreich. Und das die haimstewr und sache fu^erbas also sta^et und unczebrochen beleib, daru^eber so gib ich egenanter Wernhart der Druchsa^etz fu^er mich und fu^er alle mein erben dem offtgenanten meinem aidem hern Stephann dem Schekchen den brief zu einem warn urkund der sache versigilten mit meinem insigil und meins aidems insigil hern Ortolfs des Zaenndleins von Teraspurch und mit meins vettern insigil Leben des Druchsetzen von Go^eczesto^erf und mit Pernolts insigil des Chlingenfu^erter. Der brief ist geben ze Wienn nach Christes gepurde drewczehenhundert jar darnach in dem fumf und sibenczgisten jare an unnserr vrowen tag ze der liechtmesse.

Source Fulltext: OÖUB 8 (Wien 1883), S. 741ff., Nr. 720