Ich Chrafft von Harach und all mein erben verjehen, die guetter die ich ze lehen han von mein gena^edigen edeln herren von Rosenberich und die gelegen sint in Reyhentaler pfarr und die mit namen und mit gelt hernach geschriben stent und die ich emaln gemacht han meim lieben vetern Jansen von Harach und sein erben, dar umb er emaln mein brif hat und waz ain jegelichs gu^et aller jerlichen dient, zu dem ersten der Gusenhoff zwai pfunt pfening geltz wienner munizz und die wis in dem Nydern Reyhental ain pfunt pfening geltz, Ulrich am Ort dient drei schilling zehen pfening von aim halben ra^ewt und Ulrich der Tretler dient von aim gantzzen ra^ewt sechs schilling und zwaintzik pfening, so dient Hainczel von aim halben ra^ewt drew schilling und zehen pfening und Pylgreim dient von aim halben ra^ewt drei schilling und zehen pfening. so dient Ulrich der Na^eussel von aim halben ra^ewt drei schilling und zehen pfening Ma^erttel der Hu^enggerll dient von zwain halben ra^ewttern sechs schilling und zwaintzik pfening, so dient Peter von aim halben räwt drei Schilling und zehen pfening und Geysel die witteb dient von aim halben ra^ewt drei schilling pfening und Ja^eckel der Mu^elner dient von der mu^el und von ainem halben ra^ewt in der dorffstat dreitzehen schilling pfening und fumftzehen pfening, so dient Fridel der Leygeb von aim hoff in der dorffstat sechs schilling pfening, so dient Ha^erttel vorm holcz von aim halben ra^ewt drei schilling pfening und Stephan von Scho^enndorff dient von zwain lu^essen ane zwen dreizzig pfening und die zwaytayl zehent auf den obgenanten guettern uber all dient zway pfunt pfening geltz, so dient die wis pei dem wazzer und der a^eckcher in dem Waldrecht fümf schilling pfening, so dient die o^edmu^el genant die Mittermu^el und waz dar zu geho^ert a^eckcher und wismat ain halbs pfunt pfening und die ist mein sa^etzz von Pernhartz dez Haracher chinder und daz holcz pei dem wazzer geho^ert in die obgenanten guetter. Die obgeschriben guetter mit sampt dem gelt und nu^etzen die han ich gemacht mit der obgenanten edeln herren haut von Rosenberich von dann si leben sint meim lieben veter Jansen von Harach und sein erben nach dez briefs sag den er von mir dar uber hat also beschaidenlich, ob ich die obgenanten gueter muest oder wolt verchauffen, so schol ich im vor sagen vierczehen tag und schol er mich auch denn in der selben zeit richten ane schaden. Wa^er aber daz daz ich im die obgenanten guetter allew^e verchauffen wolt, daz scholl ich im vor sagen zweliff wochen mit ainer gewizzen und schol er mich auch in der selben zeit meins geltz nicht saumen und schol mich dez richten und wern ane allen schaden. Ich obgenanter Chrafft von Harach vergich auch mer, waz ich behabp brief und sta^ettbrief und lehen brief han die uber die obgenanten guetter sagent, die selben brief schol ich mir und meim veter Jansen von Harach nyder legen mit ainer gewizzen hincz ainem erbern mann da si uns payden wartund sind, und wenn daz ist daz mir mein egenanter veter Jans von Harach die vorgenanten guetter gar abchaufft, so scholl man im die vorgenanten brief geben und schol er auch denn mit den selben briefen und mit sampt den obgenanten guettern schaffen allen sein fru^em mit meim willen und aller meiner erben gu^etlichen willen. Wa^er aber daz er mir die obgenanten guetter gar abchaufft, so schol daz obgenant gema^echt auf dem hoff genant der Puechhoff und auf dem hoff in dem Alhuet mit sampt den gema^echt briefen gar ab sein und tod. mit urchu^ond dez briefs versigelt mit meim anhangunden insigel. und zu ainer zeugnu^esse versigelt mit meins lieben o^ehayms Jansen dez Lozsperger anhangunden insigel und mit meins lieben freuncz Ulrichs dez Frodnacher anhangunden insigel in payden ane schaden. Der brief ist geben da man zalt nach Christes gepu^ertt drewtzehen hundert jar und darnach in dem fu^emf und sybentzikem jar an sand Erharcz tag nach dem heyligen prehentag.

Source Fulltext: OÖUB 8 (Wien 1883), S. 732ff., Nr. 718