Jch Wernhart der druchtsäcz von Richerstorff vnd ich Johanns sein Enel vnd all vnser erben wir veriehen, —, daz wir durch meiner Tochter meiner Eenel mvter der Goldekerin Saeligen gescheftes wegen verchauf han Jrs freigen aygens vnd irs er chaufts guetes dem (!) Hoff dacz Go^eczenstorff Vlein von Ow^e vnd sein erben vmb zwelf phunt phenning wiener mu^enzz. —. Also beschaidenleich daz er meiner Enlein ver Johanns oder iren erben, alle iar dienen vnd reichen schol als ander irr Holden ainer alle iar ierleich zwen vnd dreizzich phenning geldes an sand Mertenstag von dem Obgenanten Hoff, Wan aber daz ist, das Her (!) den Hofstat verchaufen oder hin wil geben, wer die Hofstat Chauft der geit zwen vnd dreizzig auf vnd der sie hin geit zwen vnd dreizzich phenning ab. Vnd ich vorgenanter Wernhart der dru^echtsa^ecze von Richerstorff vnd mein Ennel Johanns, wir sein des obgenanten guetes ir scherm vnd gewer — noch des Landes recht ze O^esterreich.—— dar vber geben wir in den briff versigilten mit meinem anhangenden Jnsigil, der sache sint auch gezevg Pilgreim der Fla^eming von Go^etzestorff vnd Leb der druchtsacz von Go^etzestorff mit i^ern anhangenden Jnsigeln Jn an schaden. Der briff ist gegeben nach Cristes gepürd dreyzen hundert iar dar nach Jn dem Sechs vnd Sibentzigistem iar an sand Vlrichs tag.

Source Fulltext: OÖUB 9 (Wien 1906), S. 104-105