Ich Hainreich, von Rünting, mein Hausfraw, vnd all vnser erben, veriehen vnd tün chunt offenbar an dem brief, allen den di in sehent, oder hörent lesen, daz wir von vnserm lieben gena^edigen Herren Hern Wernherten dem Granns von Vttendorf von seiner Hausfrawn vnd von allen irn erben . recht vnd redleich geworben vnd gechaufft haben . Erbrecht . auf dem Hof ze Ru^enting . der gelegen ist in Scherdinger gericht, Also in der beschaiden daz wir in von dem egenanten Hof ze dienst . raichen. vnd geben süllen . auf irn chasten . ze rechter dienst zeit zu sand Giligen tag . Sechs vnd dreizzich metzzen dürrs chorn scha^erdinger mazz . zway Hünrr vnd ein swein für ain Halbs pfunt wienner pfenning vnd ze Stift ein pfunt pfenning vnd zway Hünrr vnd ze weised newn chäs sechtzk ayer vnd für di werichhart süllen wir in alle iar ein vaz weins von Pazzaw füren. Wir süllen in auch irn obgenanten dienst allew iar järleichen geben ze rechter zeit. alz oben an dem brief verschriben ist . vnd wenn Daz geschicht, So habent si nichtz mer hintz vns ze vodern vnd ze sprechen. Täten wir des aber nicht vnd daz wir ichtz dar inn versäzzen, So habent si vollen gewalt, vns dar vmb ze pfennden, alz ander Herren ir behaust Holden mit vnserm güten willen. So süllen si vns auch verantwurtten vnd versprechen, alz ander ir behaust Holden. an gever. Ez ist auch getaidingt. ob ein gemainer Lantzprest auz chäm, waz si vns dann pezzerung vnd genaden dar inne tünt, daz stet an irn trewn . vnd da süllen wir in nicht verrer vmb zü sprechen vnd der sach vmb den vorgenanten chauf . dez Egenanten Erbrechtz . sind Zewgen vnd auch redner gewesen. Hainreich von Hüetstokch . purger ze Schärding, Jörig Snitzzer ze Vttendorf . Nikel Raspp di zeit Chellner ze Vttendorf vnd mer erberger Lawt genüg . vnd dar über ze einem vrchünd. Geben wir in den brief versigelten . mit dez erbern mannes Hern Chünrat. dez Raspen . ze den Zeiten purger ze Scherding. anhangundem Jnsigel . der daz an den brief gelegt hat, durich vnserr vleizzigen gepet willen, im vnd allen seinen erben an schaden . wann wir nicht aygens Jnsigels haben . So verpinden wir vns . ich obgenanter Hainreich von Ru^enting . mein Hausfraw vnd all vnser erben vnder daz gagenbürttig Jnsigel . mit vnsern trewn . an aydes stat . allez daz staet ze haben . daz an dem brief verschriben ist . Der geben ist . do man zalt . von Christi gepürtt. Drewtzehen Hundert iar vnd dar nach in dem sechs . vnd Sibenczkistem iar an sand Marie Magdalene tag . der Heiligen Frawen.

Source Fulltext: OÖUB 9 (Wien 1906), S. 118-120