Wir Johans der Elter vnd wi^er Johans sein Su^en Lantgrauen zu^em Lewtenberg vnd Grafen zw Hals vnd all vnser Eriben vnd nachkomen wechennen vnd tu^en ku^ent offenleich mit dem bri^ef allen den, die in sechent, horent oder lesent, Daz wir geheyrat haben zw dem Edln wolgeporen vnserm lieben Swecher Graf Hainrich zw Schawnberch mit vnserm obgenanten lieben Su^en Lantgraue Johansen zw seiner Tochter frawn chu^enigunden dez egenanten vnsers Su^ens wirtinne vnd da er im zw gegeben hat zw rechter haimstewer zway Tawsent phu^ent gueter wienner phenning, der er vnsern vorgenanten Su^en seinen Aydem gar vnd gancz mit weraitem gelt wericht vnd wezalt hat, dez vns wol wenuegt. Da wider geben wir der obengenanten frawn Chunigunden drew Tawsent phu^ent gueter wienner phenning vnd aus den selben dreyn Tawsent phu^enten geben wir ir Tawsent phu^ent wienner phenning zw rechter Morgengab nach Lancz recht vnd die mag sy wol schaffen vnd geben, wem sy wil, ob daz waer, daz sy vnsern egenanten Sun i^ern wi^ert über lebt, vnd die andern zwai Tawsent phu^ent geben wi^er ir zw rechtem heyratguet nach dem lancz rechten, vnd daz obgenant gelt, haimstewr, Morgengab vnd heyratgu^et macht allez ain Su^em fu^emf Tawsent phu^ent wienner phenning vnd fu^er die selben fu^emf Tawsent phu^ent seczen wi^er der obengenanten frawn chunigu^enden vnser zwo Vest Rannvels vnd Pernstain, die vnser rechtz freys aygen sint, vnd darzw fu^emf hundert phunt wienner phening gelcz ja^erleicher gu^elt in vrbarn auf gestifften holden mit allen den ern, rechten vnd nu^eczen, die darzw geho^ernt vnd dauon becho^emen mugen, wesucht vnd vnbesucht, bey chlain vnd pey grozz, nichtz ausgenomen. Wa^er aber, daz der vorgenant vnser Su^en Graf hans von todes wegen ab gi^eng, da got vor sey, vor der obengenanten frown chu^enigunden seiner wirtinn an erben, so sol vnd mag sy die vorgenanten fu^emf tawsent phunt phenning niezzen vnd nuczzen vnd die obengenanten Vest vnd gu^elt dar vmb inne haben ir lebtag . vnd nach irem to^ed sullen die zway Tawsent phunt phenning, die von vnserm Su^en irem wiert ir heyratgu^et gewesen sint, her wider Erben auf vns vnd auf vnser naechst erben. Waer aber, daz sy von todez wegen vor im ab gieng, da got auch vor sey, vnd nicht erben mit einander gewunnen oder liezzen, So sol vnd mag er auch die zway Tawsent phu^ent, die man ir zw haimstewer geben hat, sein lebtag wol inn haben vnd niezzen an allew irrung vnd nach seinem to^ed sullen die zway Tawsent phu^ent hin wider erben auf den obengenanten Graf hainreichen ze Schownberch vnserm lieben Swecher vnd auf seinen naechst Erben. Auch haben wir vorgenanter Graf hans oder vnser Erben die vorgenanten zwo Vest Rannvels vnd Pernstain mit den fu^emf hundert phu^enten iaerleiher phenning gu^eltt, die wir darzw verseczt haben, vollen gewalt zw lo^efen vmb die obengenanten Su^em gelcz allczeit zwischen vnser frawn tag ze Liechtmezz vnd sand jorigen tag darnach vnd zw chainer andern zeit in dem iar. Vnd sol man dann die selben phenning an legen nach vnser payder frewnt rat, ob ez zw schulden chaem, da man sy zw payder seit west zw vinden. Auch ist zw merchken, wer phleger auf den obengenanten Vesten ist oder wi^ert, der sol in bayden allczeit swern yegleichem zw seinem rechten. Auch sey wir der obengenanten Phantschafft aller ir recht gewer vnd scherm, als dez lancz recht ist, an aller stat vnd als offt ir dez no^et geschiecht. Gi^eng aber in un der gewerschafft ichtz ab, waz sy dez schaden naem, den sol sy haben auf vns vnd vnsern trewn vnd darczw auf aller vnser hab, wo wir die haben oder wo die gelegen ist, wesucht vnd vnbesucht. Dar vber zw einem staeten vnd warn vrchu^end geben wir obengenant Lantgrauen der offt genanten frawn chu^enigunden den bri^ef wesigelten mit vnser bayder anhangvnden Jnsigeln vnd vnder dez Edln wolgeporen vnsers lieben prueder vnd vetern Lantgraue Vlreichs zwm Leutenberg auch anhangvndem Jnsigel, der sich mitsampt vns vnuerschaidnleich verpindet, ob daz waer, daz wir obengenanten Lantgraue Johanns der Elter vnd wir Johans Lantgraue der Ju^enger an Erben von todez wegen ab giengen, da got vor sey, daz er dann die obengenanten sach, pu^ent vnd artikel all, die an dem bri^ef von wart zw wart begriffen vnd weruert sint, trewleich sol enden, staet haben vnd volfu^ern er vnd all sein Eriben an allez geuaer. Vnd darzw zw einer pezzern sicherhait vnd gezewgnu^ezze mit dez Edlen vnsers lieben Swagers hern Johansen von Rosenberch auch anhangvndem Jnsigel, der ez durch vnser pet willen an den bri^ef gehangen hat im vnd seinen Erben an schaden. Der brief ist geben ze Schawnberch, da man zalt von Christ gepu^erd drewczehen hundert iar vnd in dem Sechs vnd Sybenczkistem iar an Mitichen vor sand Elspeten tag.

Source Fulltext: OÖUB 9 (Wien 1906), S. 160-162