Ich Stephan der Chlosner ze dem Stubenberg, Jch Torothe sein Hausfrow, vnd ich Kathrei ir Tochter, di ir Rechtew völligew Jar hat am Allter vnd dew si leiplichen hat bei irem erorn wirt Andren dem Haller, dem got genad, veriehen— —vmb daz Haus, aller zugeho^erung gelegen ze Pazzowe in der Stat vnder den Chramen zwischen Mertein des Wiegser vnd Niclon des Sneider Haüser, daz emolen gewesen ist des egenannten Haller, do di Erwirdigen Herren der Tümbrost, der Techent vnd gemainleich di Chorherren ze Pazzow von ir vnd irs Capitels wegen, auff, achthalb pfunt vnd dreizzikch pfenning vnd daz Spital dacz sand Johanns am Rinndermarkcht doselbs auch Achthalb pfunt . alles ewigs Purkchrechts von allter manigew Jar in nuczz vnd in gewer habent, daz in ettleichew Jar versezzen vnd wanndel darauf gangen sind, Darumb si baidenthalben mit Redleichem Rechten an offner Schrann ze Pazzow . hincz dem selben Haus chlagten vncz als lang, daz si sein geweltigtt wurden. Nu sein wir sider mit in ze tagen chömen vnd haben — — getaidingt, So daz vns, ob wir an dem egenanten Haus icht aigenschaft, übertewrung vnd Rechtens hieten, dafür gesprochen ist sumleich gelt. des wir genczlich — gewert sein, Mit der beschaiden, daz wir vnser erben . vnd frevnt noch ander niemand von vnsern wegen, hincz dem obgenannten . Haus dhain ansprach noch vodrung nimmer mer haben vnd nicht gewinnen schullen— — Mit vrchund des briefs, der besigelt ist mit meinem Stephann des Chlosner anhangundem Jnsigel vnd zu einer geczeugnüs mit der erbern meins Swager Hern ffridreichs des Stals von Stahelekk, meins vetern Hern Eberhartz des Chlosner vnd mit Vlreichs des Gewelstorffer Richter ze Pazzow anhangunden Jnsigeln — — vnd verpinden vns vnder die vier Jnsigel, — allez daz stat ze haben — daz an dem brief geschriben stet, der geben ist an sand Andres Abent, — Drewczehen Hundert Jar vnd in dem Sechs vnd Sibenczkistem Jar.

Source Fulltext: OÖUB 9 (Wien 1906), S. 166-167