Ich Peter der Thumair mein Hawsfraw vnd all vnser erben, mir (!) verJehen offennbar mit dem brief allen lewten, das wir vnnsern houe datz Raspach gelegen in Rieder Gerichte geben haben ze rechtem Erbrecht Petern von Reschpach seiner Hawsfrawn vnd allen iren erben, also mit der beschaiden, das sy vnd ir erben mir vnd meinen erben dauon dienen vnd geben sullen, alle Jar Järlichen an dem heiligen abent zu weinachtten ain pfunt wienner pfenning vnd zwen käs vnd zue Ostern zwen käs vnd Sechczig ayr vnd zue pfingsten zwen käs vnd nicht mer vnd sullen alle Jare in vnser Stift geen mit anndern vnnsern Holden mit zwain Hünren vnd an schaden darauss. Wär aber ob sy oder ir erben vns das das (!) obuerschriben pfunt nicht gäben an dem oben uerschriben tage, So geendt ye nach vierczehen tagen Sechczig wienner pfenning dar auf zu wanndel, wär aber das sy dienst vnd wanndel in drein vierczehen tagen nicht gäben, So sind sy verfallen von allen iren rechten. Wir haben in auch den obenanten Hofe vnd was dar czu gehört, es sey besucht oder vnbesücht zu rechtem Erbrecht geantwortt, auss vnser nucz vnd gewere Jn Jr nucz vnd gewere mit des Edeln Hern Hern Jo^ergen von Ahaim Hanndt, da der obuerschriben Houe von Lehen ist, vnd sein auch des erbrechtz ir Herre vnd gewere, wo in des not vnd turft beschiecht, als des Lanndes recht ist. Wir sullen auch die verantwortten als annder vnnser behawst Holden, vnd wenn das ist, das ich mit dem tod abgeen, So sullen sy das obuerschriben erbrecht von meinen erben raichen vnd den geben ain Halbs pfunt wienner pfenning vnd nicht mer. War aber, das Jr ainer abgeet mit dem tod, wie offt das geschicht, so sullen die nehsten erben allczeit raichen vnd aber geben ain Halbs pfunt wienner pfenning, vnd das in vnd irn erben das also stät von mir vnd mein erben beleib, gib ich in den erbbrief mit meinem aigen anhangunden insigel vnd zu ainer pessern sicherhait mit des oben uerschriben Herrn Herrn Jörgen von Ahaim Jnsigel, der das durch meiner bete willen zu dem meinem gehangen hat, Jm vnd seinen erben an allen schaden, dar vnder ich mich vnd all mein erben verpinten mit vnsern trewn alles das stät ze hallten das oben geschriben stet. Das geschach an sand Gallentag nach kristi gepürde Drewczehen hundert Jare dar nach in dem Sechs vnd sibenczigisten Jare.

Source Fulltext: OÖUB 9 (Wien 1906), S. 151-152