Jch Vlreich der Gebelsta(r)ffer Richter ze Pazzaw^e vergich offenbar an dem brif, allen den, di in sehent, ho^ernt oder lesent, daz vor mir vergehen hat, Her Janns, Otten des Woller Enynchel, Pfarrer ze Gmunden, daz Sechczk phenning purchrechts ligen auf seinem Haws in der Loder strazz, zwischen des czolner, vnd des Sto^ekchlein Haws, gein sand Niclo in die Oblay, also das der vorgenant Her Janns, oder wer daz egenant Haws, inn hat, Jerleich vnd vnuerzogenleichen sol raichen, sechczk phenning, an sand Mertein tag in die oblay gein sand Niclo, Wo awer, daz selb purchrecht an sand Mertein tag, vnd in den na^ehsten sechs Wochen danach, nicht geben vnd geraichet wu^ert, so verfallen sich all wochen zwelif phenning ze Wandel, das auch daz obschriben purchrecht mit den verfallen wandeln nicht wu^erd gericht in den nahsten sechs wochen nach sand Mertein tag, So hat der egenant Her Janns, oder wer das Haws inn hat, allew^e seine recht verlorn an dem vorbeschriben Haws. Auch ist ze merchen, als offt das selb Haws verchawfft wirt, so sol man nicht yden phenning des purchrechts selb fu^ennften geben zu^e salrecht, sunder der hingeit sol sechczich phenning, vnd der chawfft sol auch Sechczk phenning geben gein sand Niclo, Vnd ob das Haws von dem few^er, alter oder andern sachen chrenchtt wu^erd oder gesto^ert, wer es dann inn hat, der sol es Paw^een vnd wider pringen, dem Chloster zu sand Niclo vnengolten an seinem pu^erchrecht der sechczk phenning. Es ist auch ze merchen, daz aller geru^erter pu^ent in dem bri^ef Probst Vlreich vnd sein Conuent zu sand Niclo habent ein bri^ef gegeben dem vorgenanten Otten vnd seinen eriben, den ein yder besiczer des offt genanten Haws soll inn haben. Vnd dar über gib ich in zu vrchunt den bri^ef versigilten mit meinem vnd des obgeschriben Herrn Jannsen Pfarrer ze Gmunden, des di aigenschaft des egenannten Haws ist anhangunden Jnsigeln. Des sind zeugen Albrecht der Hewgel Purger ze Pazzaw, Peter von Siczendorf, Peter Vlreichs des Trager Su^en. Der bri^ef ist geben an vnser vro^ewn tag ze Liechtmezz, do man czalt von Christes gepurd Drewczehen hundert Jar, darnach in dem Siben vnd Sibenczkisten Jar.

Source Fulltext: OÖUB 9 (Wien 1906), S. 194-195