Jch Steffan von Fratzmanstörf vnd mein Haüsfraw Katrei Hansen dez Eytenperger sa^eligen To^echter vnd vnser aller eriben, di chünfftig sind oder werdent, wir veriechen alle an dem Prief vnd tu^en chunt allen den, dy in an sechent oder ho^ernt lesen, Daz wir mit wolbedachtem muet vnd von vnsrer. ehafft no^etdu^orft wegen vnd nach vnserr pessten frewnt Rat vnd gu^enst versatzt haben vnserm lieben frew^ont Hansen von Lew^etfering, seiner Haüsfraw^en vnd allen iren eriben vnsern tail Auf allen vnsern Gu^eten, dy mit namen hernach geschriben stent, vmb zway vnd Sybentzig pfunt gu^eter wiener pfenning, der si vns ga^entz vnd gar gericht vnd gewert habent an allen vnsern schaden . vnd daz erst ist gehaissen am Gled vnd gelegen in Chalhamer Pfarr vnd vnsern tail zu^e Altzing auf ay^em höf vnd auf ayner Hu^eb gelegen in Tau^ofchiricher Pfarr vnd dy gueter stnd alle rechtew^o aigen, vnd vnsern tail zu Eysmansperig, daz Lechen ist von vnserm genädigen Herren dem Pyscholf von Pazzawe, vnd vnsern tail zü fünsing, daz Lechen ist von der Phleg ze Valchenstain vnd pedew^o gelegen sind in Pharrchiricher pfarr, vnd vnsern tail Aüf dem Mitterngu^et ze Aeschenperg, daz lechen ist vom Pybstum (sic) ze Pazzaw vnd gelegen ist in Götschänstörffer pfarr, vnd ünsern tail zü Eytenperig gelegen in weschaider (sic) pfarr vnd ist Lechen vom Pybstum zü pazzaw, vnd vnsern tail ze Law^etzleinsperg gelegen in griespekcher Pfarr vnd ist lechen vom Pybstum zü Pazzaw. Dy haben wir in versetzt Also mit allen den ern, Rechten vnd nützzen, di da von pecho^emen mu^egen, versu^echt vnd vnuersu^echt vnd antwu^ertten yns au^os vnser nütz vnd gewer in dy iren Jn folher weschaiden: Ob daz wär, daz sew chaynerlay Chrieg oder ansprach an gieng vmb den obgenanten satzz, wie sich daz fuegt oder von wew daz cha^em, daz sullen wir in gar vnd gantz auz Richten an allen iren schaden. Täten wir dez nicht, waz si dez für baz scha^eden na^emen, den ir ayns gesprechen mag an ayd vnd vngeswörn, seinen wörten darümb zü glaüben, dy süllen si haben datz vns, vnsern trewn vnd dartzu^o aüf aller vnsrer Hab, wo wir dew überal yndert haben gewingen oder lazzen, Aüf Land, auf wazzer, nichtz aus genömen, versu^echt vnd vnuersu^echt, vnd habent si darumb an aller stat allew irew Recht erlangt, vnd waz wir da wider Rechten oder chriegten oder welherlay auf hu^eben, Daz wa^er mit Recht oder an recht, Daz haben wir all weg verlorn vnd vnrecht vnd si gewu^enen . wir sullen auch dez Obgenanten Satzz ir recht gewer vnd fürstand sein an aller stat, wo in dez not geschi^echt, Als dez Landes recht ist ob der Ens. Wir veriechen auch mer, daz si den ob genanten Satzz mu^egen versetzen oder verchaüffen vnd allen iren fru^em da mit Handeln vnd daz daz allez vnser gu^etleicher wille ist vmb daz oben verschriben gelt, wie sew lust oder wellent, Daz wir sew noch süst ander nyempt von vnsern wegen daran nicht engen noch irren su^ollen in dhainerlay weis, wie daz yempt erdenchen oder erfinden chan. Wer aüch den prief von iren wegen ynn hat oder für pringt, dem oder denselben sein wir allez dez pünten vnd schüldig, daz an dem Prief verschriben ist. Daz in daz allez sta^et vnd vnczeprochen peleib, geben wir in den offen brief versigelt mit der erbern La^ewt anhangünden Jnsigel Albrechten dez Jägenräwter zu den zeiten Phleger datz dem Ra^enna^echridel vnd Ötten dez Chapplans vnd Perichtoltz dez chapplans, dye si an den prief gehangen habent durch vnserr vleizzigen Pet willen Jn vnd iren erben an schaden. Vnd ich obgenanter Steffan von Fratzmanstorf, mein Hausfraw vnd alle vnser erben darüntter haben wir vns verpuntten mit vnsern trew^on an aydz stat allez daz sta^et zu^o haben vnd ze volfürn, daz an dem prief verschriben ist, wann ich zeder zeit aygens Jnsigels nicht enhet. Der brief ist geben Nach Christs gepu^erd Drewtzechen Hündert Jar vnd darnach in dem Syben vnd Sybentzkisten Jar an Sant Jorgen Tag.

Source Fulltext: OÖUB 9 (Wien 1906), S. 241-243