Ich Philijp vnd ich Ott geprüder die Maiwiser veriehen für vns vnd alle vnser erben vnd tun chunt offenl(eich) mit dem prief allen den di in sehent hörent oder lesent, Daz wir mit wolbedachtem mu^ot nach Rat vnd weisung erber Läwtt vnd vnser sunder freünt vnd mit rechter wilchür recht vnd redleich ze fürtzicht getaylt haben, mit vnserm lieben Swager Chunr(at) dem Stampameisen vnd sein hausfrawn Elspeten vnser Swester vnd allen iren erben, Alle dev hab di vns vnser vater Chunr(at) der Maiwiser vnd vnser mu^eter sa^olig lazzen habent und di gelegen ist in dem pu^orchfrid ze Lincz, Also daz vns obg(e)n(ant) Lijpen vnd Otten geprüdern den Maibisern an geleichen tail ledichleich ist geuallen daz Haus gelegen zwischen des Chalbleins vnd Michel dez vischer Haus, da di zeit Fridr(ich) der Soleich von Prukk wesleich inne ist gesezzen mit aller seiner zugeho^erung versu^ocht vnd vnuersu^ocht, dar czu ist vns auch geuallen der pavngarten, Haws vnd Städel da pey gelegen auf dem graben pey dem pru^enne mit aller seiner zugehörung vnd die virtzkch pfennig purchrecht gelt an dem Judenperig vnd auch die fleischpankch gelegen zwischen den zwain fleischpenchken di hintz vnser vrawn dienent vnd gehörent, versucht vnd vnuersucht mit alleu dev vnd dar zu^o gehört. Dar wider ist vnserm Swager dem obgen(ant) Chunr(at) Stampameisen seiner hausfrawn Elspeten vnserr Swester vnd iren erben hingegen geuallen ledichleich zu gleichem tail daz Haws gelegen zwischen Steffan dez Vaisten vnd Vlreichs des Sibrär Haws da si derzeit selb wesleich auch gesezzen sind mit allen den Eren Rechten vnd nutzen alz si ez vor inne habent gehabt versucht vnd vnuersucht . . . schaiden, Daz yesleiches mit seinem tail der im geuallen ist wol allen seinen frum geschaffen . . . verchauffen vnd machen oder schaffen wem oder wew er wil, an alle wider red vnd irrung dez andern tails . . . Auch ist getaidingt worden, Welcher tail vnder||
vns ab ginge mit dem tod an recht leib erben, da got lang vor sey, vnd der seines obgenanten gu^otz vnd tayles der im geuallen ist pey sein lemptigen zeiten nicht verchümert noch niemant nicht verschaft noch gemacht vnd auch nicht versetzt noch verchaufft hiet, Daz sol danne alles her wider erben auf sein nächst erben gäntzleich, di danne lebentig sind. Auch ist zwischen vns auf paiden taylen getaidingt worden, Weliges vnder vns der tailung fürbaz chrieg vnd stözzig würd vnd dem andern infäll tät an seinem tayl, der im gefallen ist, derselb Tail der di inväll macht vnd tüt, ist dem andern Tayl alles seines Tailes der im gefallen ist, verfallen gäntzleich an alle widerred vnd irrung, vnd sullen dannoch dez selben Tails Jnfäll dhain Chraft nicht haben in dhainen wegen. Vnd ist dar zu dem Hauptman ob der Enns, swer der die zeit ist verfallen zway vnd dreizzig pfunt wienner pfennig. Daz alles luben wir mit vnsern trewn an aydes stät ga^entzleichen stät ze haben an geuärd, Vnd daz die Red vnd Tailung also stät vnd vnuerchert peleib, dar über so gib ich obgen(ant) Ott Maiwiser in den prief versigelt mit meinem anhangunden Jnsigel vnd mit dez Erbern Fridrich Chraft di zeit Richter vnd Mautter ze Linie vnd Vlreichs des Smützer pürger vnd di zeit ainer dez ratz ze Lintz anhangunden Jnsigeln, die si durch vnser vleizzige pett willen an den prief habent gehangen zu einer zeugnüzz in vnd iren erben an schaden, Dar hinder ich mich obgenannter Philipp vnd all mein erben mit vnsern trewn an aydes stät verpind hinder di obgen(ant) drew Jnsigel, alles daz stat ze haben gäntzleich vnd ze volfürn, daz oben an dem prief ist verschriben, wann ich selber nicht Jnsygel di zeit han gehabt. Der prief ist geben nach Christes gepürd dreutzehen Hundert jar vnd in dem Siben vnd Sibenczkisten jar dez Suntags nach sand Marteinstag.

Source Fulltext: OÖUB 9 (Wien 1906), S. 353-354