Ich Conrad der Neusslinger, mein Haussfraw, vnd all vnser (. erben .) (!) veriechen —, das wür —, ze khauffen haben geben einn stätes vnnd Ewiges Erbrecht, auf vnnser Hueb ze Machendorf vnnd die gelegen ist, in Julbekcher Gericht, Anndreen dem Hueber ze Machenndorf, seinner Hausfrawen vnnd allen iren erben —, inn solcher beschaiden das sy vnnss Järlichen dauvon geben vnd diennen sollen. Sechs Schilling Regenspurger pfenning auf Sannct Michaelstag, vnnd ze Ostern funf Käss, das ieder Käss Zwayer Regennspurger Pfenning wert sey vnnd Sechczig Ayr, vnnd ain Schot harbs. vnnd vier hienner. Es ist auch getaidigt worden, das sy vnnss den obgenanndten dienst Järlichen geben sollen auf Sannct Michaels Tag an allen abganng. Ta^eten sy des nicht, so haben würs (!) Järlichen dar vmben ze pfenndten, auf der Egenenndten Hueb alls annder vnnser behaust Hollden. Wollten sy vnns dann die vorderung vnnd Pfanndtung in khainerlay weiss indert Widersten zue iederzeit alls oben verschriben steet. So ist der obgenanndt ir Erbrecht ab vnnd tod, —, sy sollen auch in vnnser Stifft gen Järlichen, sam ander vnnser behaust hollden vnnd an schaden wider daraus, sy sollen auch vnns vnnser Werichhart tuen alls sy vor gethonn haben, wür sollen auch des Erbrechtens, ir herr vnnd gewer sein, alls der Grafschafft recht ist ze Julbach, —. Dar iber geben wür in den Brief, mit vnnserm aignen anhanngenden Jnnsigel versigellten darunndter sich mein Hausfraw vnnd alle vnnsere Erben mit sambt mir verbinndtent alles das stät ze haben das oben verschriben stet. Der geben ist an der Aindlif Tausent Maittag, da mann zellt von Christus gepurd, Drei zechen Hundert Jar, vnnd dar nach in dem Siben vnd Sibenczigistem Jare.

Source Fulltext: OÖUB 9 (Wien 1906), S. 343-344