Ich Albrecht der Fritzestorffer vergich — das ich — gemacht vnd gegeben han meiner lieben Hausvrawen frawn Elspeten — meinen zehent halben der gelegen ist ze Molndorf wein zehent vnd traid zehent vnd allen den zehent halben chlainen vnd grozzen der zu demselben dorf gehört — vnd der ze lehen ist von dem Edeln meinen genedigem Herren Hern Rugern von Starhenberch. Also beschaidenlich daz mein vorgenante Hausvrow Elspet denselben zehent halben — mitsampt mir in nücz vnd in gewerschafft inn haben schol, di weil wir leben, Vnd ist das wir leippleich erben miteinander gewunnen, dez wir Got wolgetrawn do schol der vorgenant zehent halber vnd waz dorczu gehort nach vnser paider tod oüf erben vnd geuallen als Lehens recht ist, vnd des Lanndes ze O^esterreich. Wer aber daz wir an leippleich erben verfüren vnd nicht chinder miteinander hieten di dannoch lebten vnd ob Si mich vber lebt dannoch so schol Si den offtgenanten zehent halben mit aller seiner zu^ogehörung vnuerchumert innhaben nüczen vnd nyezzen, di weil Si lebt vnd nach mein tod so schol er herwider geuallen auf mein nest erben do er dann ze recht hin geuallen schol. —. Vnd pin ouch ich egenanter Albrecht Fritzestorffer dez vorgenanten zehent Halbes — Jr recht gewer vnd scherm — als Lehens recht ist vnd dez Landes ze O^esterreich. —, darüber so gib ich obgenanter Albrecht Fritzestorffer meiner egenanten Hausvrown Elspeten den offen brief ze einer warn sichtigen vrkund vnd ze einer ewigen vestigung der sach versigelten mi^ot meinen anhangunden insigel vnd mit meins pruder Marcus dez Fritzestorffer anhangunden insigel, darczu han ich gepeten meinen vorgenanten genedigen lehenherren hern Rugern von Starhenberch daz er der sach geczeug ist mit seinem anhangundem Jnsigel, wann daz Gemecht mit seinem willen vnd gunst geschechen ist. der brief ist geben nach Christi gepürd dreutzehen hundert Jar dar nach in dem acht vnd Sibenczigisten Jar an dem Heiligen Pluem Öster abent.

Source Fulltext: OÖUB 9 (Wien 1906), S. 420-421