Ich Vlreich von Dachsperch, Vergich —, Daz ich an stat mein selbs, vnd meiner Erben, vnd auch an meins pru^eder, Hern Wolfgers seligen von Dachsperch Chinder stat, die er hat, pey weilent seiner Haus urawn frown Dorothen, Hern Hannsen seligen von Pu^echhaim Tochter, yecz vnd Hern Jo^ergen Hausurow von Liechtenstay/on von Nykolpu^erch, die zu irn beschaiden iarn noch nicht cho^emen, vnd nicht vogtper sint, vnd die ich zu den zeiten, mit leib vnd mit gu^et, inne han, ein gantzew berichtigung — getan han, mit der egenanten frown Dorothen —, vmb die Tawsent phunt wienner phenning, die wir Jr gelten sullen, die mein Vater, Her Eberhart von Dachsperch selig, berait in genommen hat, die ir gegeben wurden, für ein Erbtail, der ir gevallen ist, von irm Enen, Hern Hadmarn dem Stuchssen seligen —, vnd vmb die fu^emfczehen hundert phunt wienner phenning, die ir der vorgenant Her Wolfger mein pru^eder, gegeben hat ze Margengab, nach des Lanndes recht ze O^esterreich, Also daz ich anstat mein selbs, vnd desselben meins pru^oder Chinder, der Gerhab ich zu den zeiten pin, vnd an aller vnserr Erben stat —, der egenanten frown Dorothen fu^er die obgenanten Dritthalb Tausent phunt gesaczt han, ze einem rechten Sacz, nach des Lanndes recht ze O^esterreich, vnsers rechten Aygens, vnser Vestt ze Pilichdorf, vnd darczüe alle die gu^olt vnd gu^eter, die hernach geschriben stent, Von erst daselbens ze Pilichdorf auf behausten gu^et, Newn mutt, vnd ayndlef metzen waicz, vnd Newn mutt vnd ayndlef meczen Habern vnd Newnthalb phunt, vnd Sechs vnd zwainczig phenning wienner mu^enzz geltes, mit allem dienst, gelegen auf den Lehenen (!) vnd fu^emft halb phunt, vnd zwen vnd dreizzig phenning geltes, gelegen auf Hofsteten, mit allem dienst, vnd den grozzen Mayrhof, gelegen ze Pilichdorf, vnd alle die Aekcher, die darin gehorent, vnd den zehent auf denselben Aekchern —, vnd den Pawhof, gelegen ze nechste dem selben Mayrhof, vnd alle die Aekcher, die darin geho^erent, vnd den zehent auf denselben Aekchern, vnd fu^enfczehen Jeuchart Akchers, gelegen oben hinder der Huntspewnt, die auch in denselben Hof gehorent, vnd den zehent darauf vnd die Mu^el daselbens ze Pilichdorf, vnd die Patstuben daselbens, vnd all die Pawmgerten, die zu derselben Vestt geho^erent vnd drew phunt geltes vogtphenning, die man dient von der Herren Gu^etern von Sand Po^elten gelegen daselbens ze Pilichdorf, vnd acht Vogthu^ener, die, die Holden dienent, die gen Chranperch geho^erent, vnd all die Vogttay, die wir haben daselbens ze Pilichdorf, es sey Ches, Hu^ener, oder ayr vnd vier vnd zwainczig Jeuch gelegen in der Mitternpewnt, davon man dient ye zway iar nach einander, fu^omf Schilling, an Sechs phenning, vnd alle iar an Sand Stephanstag, ze Weychnachten, vier vnd zwainczig Hu^oner vnd Sechs Jeuch gelegen in den Viertzehen, dauon man all iar dient Sechs vnd dreizzig phenning, vnd den zehent dar zu^e, vnd Newn Jeuchart gelegen daselbens dauon man auch alle iar dient, Sechs vnd dreizzig phenning, vnd den zehent darczu^e vnd Siben Jeuch gelegen ze Hintperger Pewnt, dient ye daz Jeuch vier phenning vnd den zehent darczu^e, vnd auf ayner Jeuchart, gelegen in den Vrbarn, die Pawl der Rauscher innhat, zehen phenning geltes, vnd gantzen zehent, ze Veld vnd ze Dorff, auf fu^emf Lehen, an ayn viertail ains Lehen, gelegen ze Pilichdorf, vnd ganczen zehent auf allen Aekchern, gelegen in der Mitternpewnt, vnd auf dem Weberperg, vnd dienst vnd zehent, auf zehen Jeucharten Akchers, gelegen auf dem Hiern, die des Putzinger gewesen sint, vnd zehent vnd perchrecht auf den Weingarten, gelegen in den langen Setzen vnd in der Plahen, vnd zwai vnd zwainczig viertail weingartens, Si sein gestifft oder vngestifft, auf yedem viertail einen halben emmer weyns Perchrechts, vnd von fu^emf viertailn gelegen in den Setzen, hinder dem Haider, auf yedem Viertail einen halben emmer Weyns, Perchrechts, vnd den zehent dartzu^e, vnd auf zwainczig halben weingarten gelegen in der Hintperger pewnt, die gestift sint, auf yedem weingarten, ayn emmer Weyns Perchrechts, vnd den zehent darczu^e, vnd auf achthalben weingarten, gelegen an der obern Huntspewnt, auf yedem weingarten, aynen emmer Weyns Perchrechts, vnd das Sechstail zehents vnd auf zwelifthalben weingarten, gelegen an dem Totzenperg ganczen zehent, vnd an dem obern Weberperg ganczen zehent vnd an dem Nidern Weberperg ganczen zehent, an waz zu der Pharr gehöret, Vnd das Sechstail wein zehent in den innern zwelifen vnd fu^emfczehen Jeuch vnd ein viertail Pawbeingarten, die zu der Vestt ze Pilichdorf geho^erent, vnd drew Ho^elczer, die do haizzent die Sawleiten, vnd allev wanndel, die daselbens ze Pilichdorf verbaricht werdent, die gehörent zu derselben Vestt, an alayn, waz den tod anru^eret. Darnach ze Oberstorff, zway phunt geltes, gelegen auf behaustem gu^et, auf zwain Lehen vnd auf einem viertail, vnd zwelif Schilling vnd zwainczig phenning geltes, daz man haizzet Rechtphenning, ||
die man dient von demselben Dorff, alle iar halb an Sand Jo^ergen tag, vnd halb an Sand Michels tag, vnd viertzehen mu^ot mynner vier meczen vogthabern, die man auch alle iar dient, von demselben Dorff ze Oberstorff, vnd acht vnd zwainczig Jeuchart akchers, gelegen an der Pfenichleiten dient ye die Jeuchart vier phenning vnd den zehent darauf, vnd den zehent, gelegen in dem Chuetal vnd allev wanndel die daselbens ze Oberstorf verbaricht werdent, an swaz den tod an ru^oret vnd allev vogttay, vnd Panthay^edigen, die wir haben daselbens, als es mit alter hercho^emen ist, vnd vnser wys, gelegen ze Helma nyderhalb des Dorffs, darab wir den dienst von dem Cheriglein abgechaufft haben vmb zwainczig phenning geltes, gelegen daselbens, ze Helma auf einem Akcher, die man dient an vnser Vrown tag zu der Schidung, vnd ze Engelreichstorf, einen halben mutt waytzes geltes, den man dient von einem halben Lehen vnd zwelif Schilling vnd dritthalben phenning geltes gelegen auf dem selben halben Lehen, vnd auf Hofsteten daselbens ze Engelreichstorf, vnd ein Drittail aus einem Lehen czehents gelegen ze Eberhartstorf, vnd alles daz das zü der vorgenanten Vest ze Pilichdorf vnd zu den vorgeschriben Gütern allen gehöret, in Vrbar, ze Holcz, ze Veld vnd ze Dorff. es sey gestifft oder vngestifft, versücht, oder vnuersu^echt, aigen, vnd lehen, wie daz genant ist, mit allen den nu^eczen, eren vnd rechten, als wir daz aygen in aigens gewer, vnd daz lehen in Lehens gewer herpracht haben. Auch haben wir der egenanten frown Dorothen gesaczt die Vogttay ze Eybesprunn, die vnser Satz ist, von vnsern Herren den Herczogen in O^esterreich fu^er achczig phunt Wienner phenning, daz ist vierczehen Schilling vnd Siben phenning geltes Vogtphenning vnd acht mu^ott vnd acht metzen vogthabern, vnd drey Schilling geltes, gelegen auf einem ganczen Lehen, da zu den zeiten Hainreich Cholman aufgesezzen ist, vnd daz Pantaydigen vnd aller Wanndel daselbens ze Eybesprunn, waz den tod nicht anrüret, mit allen den nu^eczen vnd rechten, als wir es in Satzes gewer herpracht haben, Also, mit ausgenomen Worten, daz die egenant frow Dorothe die vorgenanten Vestt vnd güter, mit allen den nu^eczen, eren vnd rechten, die dar czu^o gehorent, ausgenomen Stewr wannd der sullen (sic) wir noch Si, darab nicht nemen, in nucz vnd in gewer haben sol, vnd niezzen fu^er die obgenanten dritthalb tausent phunt an abslag der nu^etz, als Satzes vnd Lanndes ze O^esterreich recht ist, vncz an irn tod. Darczu^o sullen wir Jr raichen vnd dienen, alle iar fümf phunt wienner phenning an Sand Michelstag, vnd sullen ir di raichen gen Pilichdorf von vnsern gu^etern, die wir haben ze Chrantperkch an alles vertziehen, Vnd denn nach irm tod, So sullen die vorgenanten fümfczehen hundert phunt, die von dem egenanten meinem pru^eder ir margengab sint, herwider geuallen auf mich vnd auf desselben meins pru^eder Chinder, vnd auf vnser Erben an allen chrieg, denn die vorgenanten Tawsent phunt, die ir für irn erbtail, von irm Enen geuallen sint, die sullen nach irm tod geuallen, wenn si die mit irem brief, schaffet, machet oder geit, vnd derselb dem Si dieselben Tawsent phunt, also schaffet, machet, oder geit, der sol denn die vorgenant Vestt vnd güter, mit aller zugehörung, so vorbenant ist, dafür innhaben in nucz vnd in gewer, niezzen vnd nüczen, als Saczes vnd Lanndes recht ist, an abslag der nu^ecz, als lang vncz das ich, oder des egenanten meins pru^eder Chinder, oder vnser Erben, dieselben Vestt vnd gu^eter losen, vmb Tawsent phunt wienner phenning, vnd derselben Losung sullen wir, nach der egenanten frown Dorothen tod vollen gewalt vnd recht haben ze tu^en, weliches iares vnd zu welicher zeit in dem iar, wi^er mu^ogen oder wellen, So sol vns des der, dem Si die vorgenanten Tawsent phunt mit irem brief schaffet, machet oder geit, stat tu^en vnd gehorsam sein, an all vercziechung vnd widerred, Wann wir Jn mit denselben Tawsent phunten ermanen, Wer aber, daz ich, oder des egenanten meins prüder Chinder, oder vnser Erben, die egenanten Vestt vnd gu^eter von der egenanten frown Dorothen losen wollen, die weil Si lebt des haben wir vollen gewalt ze tu^on, vnd die sol si, vns auch an all widerred ze losen geben, weliches iares wir die losen mu^ogen oder wellen, zwischen weichnachten vnd Vaschang vnd zu chainer andern zeit im iar Vmb dritthalb tausent phunt wienner phenning, Also, daz Si denn von den selben phenningen Tawsent phunt berait nemen sol für die obgenanten Tawsent phunt, die Jr für im erbtail geuallen sint, vnd die mag Si geben, wem Si wil vnd damit tu^on vnd schaffen, waz Si wil, denn die vbrigen fümf- ||
czehen hundert phunt sol Si anlegen in dem Lannde ze O^esterreich, nach vnserr baider frewnt Rat, als Margengab vnd desselben Lanndes recht ist, inne ze haben vnd ze niezzen, zu iren lebtagen vnuerchumert, daz ich vnd des egenanten meins pru^oder Chinder vnd vnser Erben, die selben fümfczehen hundert phunt, nach derselben frown Dorothen tod, wizzen ze vinden, an alle irrung — —. Vnd daz die Hanndlung vnd Sach fu^erbaz also stet vnd vnczerbrochen beleib, Dar u^eber so gib ich obgenanter Vlreich von Dachsperch für mich vnd für des egenanten meins pru^eder Chinder, Vnd für alle vnser Erben, den brief ze einem warn vrkund der sach versigilten mit meinem Jnsigel vnd mit der erbern Herren Jnsigiln Hern Wernharts von Meichsaw obrister Marschalich, vnd zu den zeiten Lanntmarschalich in Österreich, Herrn Albers von Pu^echhaim obrister Druchsa^ecz in O^esterreich, Hern Vlreichs von Chranichperg vnsers Swagers, Hainreichs von Dachsperch vnsers Vettern, vnd Hern Wolfgangs des Strewnen vnsers O^ehems, die der Sach getzewgen sint mit im Jnsigiln. Der brief ist geben ze Wien nach Christes gepürt drewtzeh(en) Hundert iar, darnach in dem Acht vnd Sibenczgistem iar, des nechsten Mentags vor vnsers Herren Gotsleichnam Tag +.

Source Fulltext: OÖUB 9 (Wien 1906), S. 460-465