Ich Rüdolff von Scho^ennaw der ju^enger Hewraus vnd ich Pernger von Lanndenberch vnd all vnser erben, Wir vergehen — daz wir vnuerschaidenleich gelten sullen Hetschlein dem Juden von Hertzogenbu^erch maister Jsrahels svn von Chrems vnd seinen erben zwaintzig phunt wienner phenning der wir Si wern sullen an sand Mertteins tag der schi^erist chu^omt, Tu^on wir dez nicht, So sol fürbas gesu^ech darauf gen auf ain i/agleich phunt vier phening alle wochen vnd wenne Si Hauptgu^ets vnd schadens nicht lenger peiten wellent, So sullen wir Si irs Gu^ots wern. Tu^on wir des auch nicht, So sol vnser ainer welhen Si vnder vns paiden monent vnd vodernt einen erbern chnecht selbander mit zwain pherten des nechsten tags darnach ze Wienn in ein erber gasthaws senden wo Jm die vorgenant Juden hin zaigent vnd sullen die da inne ligen vnd laisten als inneligens vnd laistens recht ist vnd da nicht auscho^emen Si werden ee Hauptsgu^ots vnd schadens gargewert, das lu^oben wir Jn ze laisten mit vnsern trewn an alles geuerd, Es wechst auch dennoch der gesu^och auf die vorgenant phening, man laist In, oder nicht als vorgeschriben stet, Si sullen auch Hauptgu^ot vnd schaden haben auf vns vnuerschaidenleich vnd auf allem vnserm gu^ot das wir haben in dem Lannde zu O^esterreich oder wo wir es haben wie daz genant ist dauon Jn der Lanndesfu^erst oder wer seinen gewalt hat an alles fu^erbot vnd an alle chlag phannd antwu^orten sol wo die vorgenant Juden darauf zaigent, wenne Si sein nach dem obgenant tag nicht lenger enpern wellent alsuerre daz Si Hauptgu^ots vnd schadens gantz vnd gar dauon verricht vnd gewert werden, wir sein lebentig oder tod, Wir lu^oben Jn auch mit vnsern trewn an geuer daz wir Si vmb Hauptgu/at noch vmb schaden weder hincz Hof noch an chain gewaltige Hant noch nindert als wohin schaffen sullen noch das wir weder vreibrief to^ettbrief noch gegenbrief von der Herschafft vmb das vorgenant gelt, v^eber i^ern willen wider Si gewinnen sullen denne das wir Si selber irs gu^ots wern sullen als vorgeschriben stet, Vnd wer den brief mit der vorgenant Juden gu^etem willen inne hat vnd vns damit mont, dem sein wir alles des gepunden ze gelten ze laisten vnd ze uolfürn das vorgeschriben stet ze gleicher weise als Jn selber, vnd darüber so geben wir Jn den brief zu einem warn v^erchund der sach versigilten mit vnsern insigiln der geben ist ze wienn nach Christes gepu^erde drewtzehen hundert jar darnach in dem acht vnd Sibenczgistem Jar des nechsten mitichens vor sand Vlreichs tag.

Source Fulltext: OÖUB 9 (Wien 1906), S. 475-476