Ich Hainreich der Harthaimer ze Ebesperch vnd all mein Erben, dy nu sind oder hernach chünftig werdent, Wi^er vergehen offenlich mit dem pri^ef. vnd tun chunt allen den dye in sehent oder ho^erent lesen. Daz wi^or mit wolbedachtem mu^et nach vnserr nachsten frewnt rat, ze der zeit, do wi^er ez wol getu^en machten, Recht vnd redleich haben ze chauffen geben, Dem edeln erbern Herren Hern Weykcharten von Winchel. dy zeit Pfleger ze Ebelsperch, vnd seinen Erben, vnser Lehen ze Trawndo^erf pey dem prunn gelegen in sand florianer pfarr mit aller zue geho^erung, daz wir haben ze lehen gehabt von dem Ho^echwi^erdigen fu^ersten, vnserm gna^edigen Herren Hern Albrecht Pyscholf ze Pazzaw, vnd von seinem Gotshaws. mit des Hant, gunst vnd willen wi^er in den Chauf vnd daz vo^ergenant Lehen haben besta^ett. vnd richtig gemacht. wi^er haben in auch daz obgenant Lehen mit aller zuegehörung in geben. vnd in geantwu^ert. auz vnser nucz vnd gwer in i^er nucz vnd gwer mit allen den nuczen eren vnd rechten, di dar zue geho^ernt, vnd da von becho^emen mu^egen, ze Holcz, ze wysmad, ze veld ze do^erf, gestifft vnd vngestift, besu^echt, vnd vnbesu^echt, wye daz genant ist. alz wi^er daz, vnd vnser vo^edern, vnuersprochenlich in nucz. vnd in gwer inn gehabt vnd her pracht haben an geuer. vmb zehen pfunt wyenner pfenning, der wi^er genzleich vnd gar gericht vnd gewert sein, ze rechten tegen an allen schaden vnd schullen daz obgenant Lehen, mit aller zue gehörung fu^erbaz freileich vnd ledichleich inn haben, nuczen vnd niezzen, als wi^er ez selb inn haben gehabt. Vnd schu^ellen vnd mügen fu^erbaz allen i^eren frumen damit geschaffen mit verseczen mit verchauffen. vnd geben wem si wellend, an all i^erung. Also, mit der beschaiden, daz wi^er noch vnser erben vnd nach cho^emen. noch ander nimand von vnsern wegen, hinfu^er auf daz obgenant lehen nichtz mer ze sprechen noch chainn ansprach, vodrung noch recht schullen haben, mit recht noch an recht noch mit chainen sachen, angeuer. Wi^er sein auch des Chaufs vmb daz obgenant lehen mit aller zuegeho^erung. i^er recht gewern vnd fu^erstand fu^er all ansprach vnd chrieg, wo in des du^erft geschi^echt nach dem Landes recht ob der Enns. Wer aber daz in mit dem rechten, an der gewerschaft icht abgieng. oder daz si fu^erbaz chain chri^eg. ansprach, sto^ezz oder in vell daran gewv^onnen, von wem daz wer, daz den i^er ainz pey seinen trewn. an ayd vnd an recht gesprechen mag, den selben schaden. schu^ellen wi^er in genczleich ablegen vnd wider cheren. vnd schullen si daz haben auf vns. vnd auf aller vnser Hab, dy wi^er haben oder lazzen, wo wi^er di haben inner Landes, oder auzzer Lands, auf wazzer oder auf Lant. besu^echt vnd vnbesu^echt. Wi^er sein lemtig oder tod. vnd schullen vnd mugen derselben i^err scheden da von becho^emen. an chlag. an recht, an fu^erbot, vnd an allez gericht. mit vnserm gu^etleichem willen. Daz lüben wi^er in allez stet ze haben mit vnsern trewn an geuer. Vnd dar v^eber zu einer v^erchund der warhait. gib ich in obgenanter Hainreich der Harthaimer den prief fu^er mich vnd fu^er all mein erben versigelten mit meinem anhangundem Jnsigel vnd mit des erbern Chnechts Jnsigel Petrein des Scho^ennawer, der gezewg ist der sach mit seinem anhangundem Jnsigel i^em vnd allen seinen erben an schaden. Der pri^ef ist geben nach Christes gepu^erd drew zehen Hunndert Jar dar nach in dem acht vnd Sybenczgistem Jar an Mentag vor sand Vrbans tag.

Source Fulltext: OÖUB 9 (Wien 1906), S. 443-444