Karolus quartus diuina fauente clemencia Romanorum Imperator, semper augustus et Boemie rex, . . judici, . . scabinis ac tote uniuersitati ciuitatis nostre Budeweys, fldelibus nostris dilectis, graciam nostram et omne bonum. Fideles dilecti. Quia ad instanciam nobilium de Rosemberg, fidelium nostrorum dilectorum, indulsimus et nunc fauemus ipsis et opidanis eorum in Wytingnow et in Swencz, quod semel dumtaxat in septimana opidani in Wytingnow duos currus salis et non plures, de Libera Ciuitate via directa versus dictum opidum Witingnow, sed et illi de Swencz vnum currum salis, et non plures, in septimana de Libera Ciuitate predicta versus ipsum opidum Swencz possint adducere et ibidem vendere, nec licebit eisdem per aliam viam transire, neque de sale sic adducto ad alia loca quidquam abducere. Et in casum, quo secus facerent, licitum erit vobis tam sal per aliam viam adductum et vltra tres currus predictos ad opida huiusmodi, vt premittitur, apportatum cum aliis rebus ibidem inuentis reeipere ac eciam arrestare, prout dictis de Rosemberg literas de hoc scripsimus speciales. Vobis iniungimus et presentibus seriore mandamus, quatenus inconcussam ordinacionem debeatis huiusmodi obseruare et nichilominus omnia alia inter dictos de Rosemberg ac eorum homines ab vna parte, nec non vos ab alia vertencia vsque ad festum Natiuitatis Christi proxime nunc futurum tenere pacifice in suspenso, nec preter ea, que superius dicta sunt, aliquam facere nouitatem, prout nostram indignacionem volueritis euitare. Datum Prage die XXV. Maii, regnorum nostrorum anno XXXIJ, imperii vero vicesimo quarto. Per dominum Pragensem archiepiscopum de Poznania Nicolaus.

Source Fulltext: OÖUB 9 (Wien 1906), S. 445