Wir Albrecht von gotes gnaden Herczog ze O^estereich, ze Steyr, ze Kernden vnd ze Krain, Graf ze Tyrol zc, Bekennen vnd tu^on chunt offenlich mit disem brief, Daz wir vnsern Purgern ze Ens die gnad getan haben, daz der Purger kainer dhaines wandels dem Richter veruallen sein sol, es sei denn, daz dem Richter das wandl in der Schranne mit vrag vnd mit vrtail verualle. Darzu gebietn wier gar ernstlich vnd wellen auch, daz man vnsern Rat ze Ens in Eren hab, als pillleich vnd recht ist. Wer in daruber icht tet, daz vnpilleich wer mit worten oder mit werchen, den wellen wier swerlich darumb pezzern, wann die vorgenanten vnser Purger von vnserm lieben Herren vnd Vatter Herczog Albrecht selig auch ze geleicher weis einen solichen brief habent. Geben ze Wienn an Mitichen nach dem Suntag Oculi in der vasten Nach kristes gepurd dreuczehen hundert Jar darnach in dem Nevn vnd Sibenczigisten iare. dominus dux per Johannem de Tyrnauia,

Source Fulltext: OÖUB 9 (Wien 1906), S. 592-593