Ich Paul der Redler von Sichtenberch vergich für mich vnd all mein erben, daz wir vmb all chrieg vnd stözz vnd misshelung vnd auch vmb allez daz, daz wir Jch vnd mein vetter Mertt der Redler von Sichtenberch gegen einander ze sprechen haben — gegangen sein vnd vns auch verlubt vnd verpunten haben — hinder dew erbern dew hernach geschriben stent, von erst Her Ott? der Topler vnd Her Janns der planchenstainer vnd her wulfing der Planchenstainer vnd Her Michel der Vttendorffer vnd leb der Druchsecz vnd Paul von Emmerstorf, vnd sol auch Her wernhart der Druchsecz der Sibent sein vnd sol auch ich vorgenanter Paul der Redler all meine presten vnd vadrung dew ich hincz meinen egenanten vettern Mertten hab für di vargenanten suben pringen vnd waz sew dann der vindent vnd sprechent mit dem rechten, da sol ez fu^erbaz pey beleiben. Wa^er aber daz der spruchmann ainer oder meniger abgieng, so mu^egen dew andern wol ander zu in nehmen alz manig . . . ab gegangen ist, also daz der spru^ech volfueret werd waz di obgenanten suben sprechent, wa^er auer daz dew vorgenanten spru^ochleut nicht ainhellig wurden, vnd wo der maist tail hin geuellet, da sol ez pei beleiben, wer auer daz ich obgenanter Paul vnd mein erben daz nicht stet hiet vnd vnd (!) volfuericht, daz obengeschriben stet, wann mich dann mein Egenanter vetter Mertt, vnd sein erben vodernt, so sol ich in laisten mit vir pherten hincz sand Pölten in ain Eber (!) Gasthauß wo sew mir hin zaigen, vnd sol da inne ligen vnd laisten vnd nicht auschomen daz in alz daz volfueret wirt daz vargeschriben stet, wer auer daz in laistung von vns verczogen wurd, so sol vns vnser Herr der Herczog von O^esterreich oder wen er dar zu^o schaffet dar zu^o no^etten vntz daz in alz daz volfu^eret wirt daz oben geschriben stet, Vnd zu vrchund der sach gib ich vargenanter Paul fu^er mich vnd all mein erben in den offenn prief versigilten mit meinem anhangundem Jnsigil, dar zu^o han ich gepeten, meinen Swager Leben den Druchseczen, daz er der sach geczeug ist mit seinem anhangunden Jnsigil. Der prief ist geben nach Christs gepu^erd Dreuczehen Hundert iar darnach in dem Neu/an vnd Subenczgisten iar am Swarczen Suntag.

Source Fulltext: OÖUB 9 (Wien 1906), S. 603-604