Ich Vlreich der Vinkch vergich offenleich mit dem prief vnd tün chunt allen den dy in sechent Hörent oder lesent, Vmb di vänkchnüzz, da ich ze Enns geuangen gewesen pin, da han ich mich verpunden nach meiner frewnt vleizzigen pet willen vnd ander erberer lewt vnd verpint mich auch mit dem prief mit meinen trewn an aydes stat, also das ich obgenanter Ülreich der vinkch vnd mein Hausuraw ann vnd all mein Erben vnd all mein frewnt vnd Helfer wie dy genant sind noch nymant von meinen wegen fürbas chain veintschaft noch vnwillen gen der obgenanten Stat ze Enns vnd gen allen purgern da selbs Reich vnd arm wie di genant sind vnd gen aller ma^enichleich von der obgenanten Vänkchnüzz wegen nymmer mer haben noch gewingen schüllen weder vil noch wenig in chainer weis weder haymleich noch offenleich an alles geuär. Vnd dar zü han ich mich auch verpunden vnd versprochen vnd verpind mich auch mit dem prief, das ich obgenanter Ülreich der Vinkch fu^erbas in dy obgenanten Stat ze Enns vnd in den Pürkchfrid da selbs an der obgenanten purger willen ze Enns nymmer mer cho^emen schol weder haimleich noch offenleich weder pei tag noch pei nacht in chainer weis. Wär aber das ich fürbas in dem obgenanten Pürkchfrid ze Enns pegriffen vnd erfunden würd oder das ich das vnd an dem prief geschriben ist, indert vberfür, mit warten oder mit werichen So schol ich obgenanter Ülreich der Vinkch mit zwain mannen vnd mit dem prief vbersagt vnd vberwunden sein vmb rechten Lantz schaden an alles vercziechen. Vnd schüllen auch darumb mein obgenante Hausuraw ann vnd all mein erben vnd all mein frewnt vnd Helfer fu^erbas chain veintschaft noch vnwillen gegen nymant haben an alles geuär. Vnd des alles ze ainen waren vnd stäten ürchunt gib ich obgenanter Vlreich der Vinkch den prief versigelten vnd wol bestätt mit der erbern Hansen des Wedels vnd Hansen des Steger di zeit schaffer ze Erlachloster (!) paiden anhangunden Jnsigeln die paid da mit geczewgen sind durch meiner vnd meiner frewnt vleizzigen pet willen in paiden vnd iren erben an schaden, Dar vnder verpint ich mich obgenanter Vlreich der Vinkch mit meinen trewn an aydes stat alles war vnd stät ze haben das an dem prief geschriben ist, wenn ich di zeit aygens Jnsigels nicht het, Der prief ist geben nach Christi gepürd vber drewczehen Hundert Jar vnd dar nach in dem Naw^en vnd Sibenczkisten iar des nägsten Mantags nach sand Jörigen tag.

Source Fulltext: OÖUB 9 (Wien 1906), S. 617-619