Ich Öfferl der Anhanger bechenne. Offenleich mit dem Brief. vmb di vanchnu^ezz darein ich chömen bin von meins lieben gena^edigen Herren Herczog Fridreichs geschäftz wegen, dar vmb mich sein vicztwm Her Jo^erg der Waldekker gevangen hat, von der selben Handlung vnd vanchnu^ezz wegen habent all mein Heren, frewnt vnd gesellen erpeten mein obgenanten Herren vnd sein vicztum daz er mich der selbigen vanchnu^ezz vnd gelu^eb ledig lazzen hat. vnd habent mich meiner vnschuld geniezzen lassen. also. daz ich hin fu^er meins obgenanten Herren, seins vicztum, Lant vnd Lawt Hu^eld dar vmb haben sol, Mit der beschaiden, daz ich all mein Herren, bru^eder vnd frewnt, Helfer vnd all mein gesellen dhain veintschaft noch ansprach von der obgenanten vanchnu^ezz wegen nimer mer hincz meinen obgenanten genädigen Herren seinem vicztum Jögen (!) dem Waldekker, Lant vnd Law^eten vnd besunderleich aller der die an meiner vanchnu^ezz schu^eldig sind nit haben, noch gewingen sol weder mit recht noch an Recht trewleich an alz geva^er vnd dar vmb han ich einen gestalten aid gesworen hintz den Heiligen daz allez trewleich stät vnd wa^er ze lazzen, daz Oben an dem Brief geschriben stet, dar vmb ze einer warn geda^echtnu^ezz. vnd sicherhait gelob vnd gehaizz ich mit meinen trewn an eins geswören aydes sta^et, di ayd vnd trew trewleich sta^et vnd war ze Lazzen, di ich dar vmb gesworn vnd gegeben han vnd gib dar vmb den Brief versigelten vnder meinem Anhangundem aigen Jnsigel. Dar zw mit meiner lieben Bru^eder Jnsigel Hern Veyten vnd Jöchleins der Anhanger dar vnder ich mich all mein Brüder, frewnt vnd gesellen verbinten die obgennanten gelu^eb vnd gehaizzen stät vnd war ze halten trewleich an alz geuär. Anno domini. M. CCC°. LXX°. IXn0 in die Sancti Egidij confessoris.

Source Fulltext: OÖUB 9 (Wien 1906), S. 692-693