Wir Albrecht von gotes genauen Bischof ze Pazzaw, bechennen vnd tu^en chu^ent, daz vnser lieber Swager Stephan von Hohenberch. vnserr lieben Swester Margreten von winkchel, seiner hausfrawn, mit vnserr hannt, gu^enst, vnd willen, ir morgengab redleich gemacht hat. auf allen Zehenten, weintzehenten, vnd traidzehenten. grozzen vnd chlainen, gelegen ze freyndorf. vnd ze pawngarten. vnd auf allen traidzehenten, gelegen ze Chappellen, ze Mawtternheim, vnd ze Ga^ewtendorf, vnd swas zu^e denselben zehenten geho^ert, swas er, vnd sein bru^eder, die von Hohenberch, derselben zehent aller, von vns, vnd von vnserm gotzhaus ze Pazzaw ze lehen habent, vnd daz egenant gema^echt ist beschehen in der mazze, alz der brief lawtt, vnd sagt, den er, der vorgenanten vnserr Swester, seiner hausfrawn, daruber geben hat. Vnd nach seiner vleizzigen pet besta^eten wir das obgenant gema^echt, in dem rechten so vor beru^ert ist, alz wir ze recht su^ellen vnd mu^egen. Mit vrchunde des briefs, besiegelten mit vnserm angehangen insigel. Geben an sand Michelstag, Nach kristi gepu^erde, Drewtzehen Hundert iar, vnd in dem Newn vnd Sibentzigisten iare.

Source Fulltext: OÖUB 9 (Wien 1906), S. 714