Wir Albrecht vnd Leujpolt gebrüder von Gottes genaden, Herczogen zu Osterreich, zu Steir, zu Kernden, vnd zu Krayn, Grauen zu Tirol zc. Tun chünt, das wir haben angesehen di grossen trew vnd lieb, So di erbern vnd weisen, di burger von Regensburg zu vns vnd vnsern Landen habend, vnd haben all ir kauffleu^et, in vnsern scherm vnd sicherheit genomen, in den selben vnsern landen, das si Leibes vnd gutz sicher sein, das in vnd daraus ze varen, auf wasser vnd auf Land, vncz an vnser wider rüffen, also, das si mit irer kaufmanschaft, her gen Wienn faren, vnd die hie nider legen, nach sag des alten brifs, den di Stat zu Wienn von vnsern vorvodern selig dar über hat, vnd das di egenanten kauflaüt von Regensburg, in vnsern Landen richtten vnd geben, di gewonlichen Mau^ett vnd zolls, vnd andre recht, als von alter her kömen ist, on alles geuer, auch mainen wir, das man ir dhainen, für den andern in vnssern landen nicht aufhabe, noch verpiet in dheinem wege, ausgenomen, ob man ieman der vnsern zu Regensburg, Rechte verzu^eg, So mag man ir Leib, oder güte, in vnsern Landen wol daru^emb auf haben, So verre, vncz den vnsern ein pillichs wider uert, doch sullen wir oneinander (!) der vnsern, das erlauben, wir seczzen, ee, di vorgenanten von Regensburg zu rede, mit vnsern briefen, vnd wenn wir di egenante sicherhait wider rueffen, So sullen si dannoch hin nach, zwen gancz Moneid, di nachsten nach einander sicher sein, als vor in den vorgenanten vnsern Landen, für vns vnd all di vnsern, der wir gewaltig sein on alles geuerd, da von enphelhen wir vnsern liben, getrewn, allen Haubtlaüten, Herren, Rittern vnd knechten, allen pflegern, purggrauen, Richtern vnd andern ambtläuten, vnd wellen ernstlich, das si di egenanten kaufflaüt von Regensburg dabei halden, vnd schirmen, vnd in dawider dhein irrung tun. mit vrchund. dicz brifes, Geben zu Wienne an Montag vor sand Bartholomeüstag, des heiligen zwelfpoten, nach Christi gepürtt, Drewczehen, hündert Jar vnd in dem Newn vnd Sibenczigisten Jar.

Source Fulltext: OÖUB 9 (Wien 1906), S. 683-684