Ich Hans der Paternostrer. vnd mein Hawsfraw. vnd mit sampt vns alle vnser erben, wie die genant sind, vergehen vnd tu^en chunt mit dem offen prief vor allen Lewten gegenwu^ertigen vnd chunftigen, Daz wir mit wolbedachtem mu^et, mit gunst vnd willen vnser erben, zu^e der zeit vnd wir daz mit recht wol getu^en machten. vnd ez niemant widersprechen macht noch widersprach recht vnd redleich. ze chauffen geben haben vnserr gu^et an dem prant genant in pehaimperger pharre gelegen, daz freyes ist, dem chindlein, Elspeten, Petern dez pawern dochter ze Steyr vnd seinen erben. vnd haben in auch daz selbig gu^et gegeben mit aller der sta^et vnd si dar zu^e bedu^erffen aus vnserr nucze vnd gewer in ir nucze vnd gewer mit allen den eren rechten vnd nuczen die dar zu^e geho^erent vnd da von becho^emen mugen. ze Holcze, ze velde, ze wismad, ze wazzer, ze waide, ez sei gestifft oder vngestifft gepawen oder vngepawen wie daz alles genant ist, versucht vnd vnuersu^echt, vmb ain gelt. dez si vns gancz vnd gar gericht vnd gewert habent, Also daz wir noch alle vnser erben hincz dem selben gu^et nimmer mer dhain zu^espru^eche noch ansprach haben noch gewinnen sullen weder mit recht noch an recht vnd tu^en vns auch dez aller sache gancz vnd gar mit dem prief ze fu^erzicht. Wir sullen vnd wollen auch desselben gu^ets ir gewer vnd fu^erstant sein, wo in dez no^et vnd durft geschicht nach dem Lants recht als chauffes freyes aigen recht ist in dem Lande ze O^esterreich. Na^emen si dar vber von der gewerschaft wegen mit recht indert dhainen schaden, wie der selbig schad genant wurde, den si oder irer erben ainer pei iren trewn an aide gesprechen mugen, denselben schaden sullen wir in aller sache genczleich vnd gar awsrichten ablegen vnd wider cheren an alle widerrede vnd sullen auch daz haben dacz vns vnd vnsern trewn vnd dar zu^e dacz aller vnser hab vnd wir haben, wo wir die haben inner lants oder awzzer lants versu^echt vnd vnuersu^echt vnd desselben schadens da von becho^emen an chlag, furbot vnd recht so si aller nachst mugen mit vns vnd vnser erben gu^etleichem willen vnd wort, wir sein lembtig oder tod. Daz die rede hinfu^er staet vnd vnuerchert beleib dar vber gib Jch Hans der paternostrer dem obgenanten chindlein Elspeten, Petern des Pawern dochter vnd seinen erben den prief fu^er mich vnd alle mein erben zu^e ainem sichtigen waren vrchu^ende der warhait vorsigilten mit meinem anhangunden Jnsigil vnd zu^e ainer gu^eten geczewgnu^esse mit der erbern Go^etfrids dez Sinczenperger vnd Niclasen dez Hi^enderholczer zden zeiten phleger ze Steyir vnd mit Eberharts dez Mulbanger zden zeiten Statrichter ze Steyr anhangunden Jnsigiln in an schaden. Geben nach Christi gepu^erde Drewczehen Hundert iar dar nach in dem Newn vnd Sibenczgisten iar an sand Bartholomeustag.

Source Fulltext: OÖUB 9 (Wien 1906), S. 688-690