Ich Hertneid von Losenstain, vergich fu^er mich, fu^er mein Hausfrawn, vnd für all mein erben offenleich mit dem brief, allen den er fu^er chu^empt, vmb den Chorhof ze Pazzaw, gelegen zwischen dez Leibmiczer Hof, vnd des Pfarrhof, zu sand Pauls, der weilent meins pruder Hern Gundakcher Chorherrn doselbs ze Pazzow sa^eligs gewesen ist, den er mir vnd meinem pru^eder Hern Perichtolden Chorherrn vnd pfarrer ze Salczpurkch an seinen lesten zeiten geschaft vnd gelazzen hat, also, daz wir etwaz seins gescheftes dauon ausrichten solden, daz wir auch redleich vnd ga^enczleich getan haben. Nu het ich vorgenanter Hertneid von Losenstain meinem egenanten pruder Hern perichtolden meinen tail des vorgeschriben Hofs vor etleich zeit zu seinen Lebtagen gegeben, also, daz der selb Chorhof, nach seinem tod her wider an mich vnd an mein erben ga^entzleich geuallen solt, alz er des brief von mir hat, dar nach haben wir vns, ich vnd mein prüder Berichtold, aber ga^entzleich veraint, also, daz ich im meinen tail des Hofs gegeben han, mit aller zu^egeho^erung vnd auch gi^eb gegenbu^ertichleich durch pru^ederleiche trew mit dem brief, mit der beschaiden, daz ich noch mein erben, noch niemant von meinen wegen chain ansprach hin fu^er nimmer mer dar zu gehaben, noch gewinnen su^ellen, mit recht oder an recht, vnd mag, der oftgenant Her Berichtold, mein prüder, den vorberürten Hof geben, schaffen, verchauffen, wem oder wann er wil, doch nach recht vnd gewonhait anderr Chorho^ef ze Pazzaw, wie in gelu^est an alle irrung mit meinem vnd meiner Erben gu^etleichem willen vnd gu^enst, Vnd des zu einem vrchund gib ich im den brief besigelten mit meinem vnd des Erwirdigen meins lieben Swager Hern Johansens von Scha^erffenberch, die weil Tu^emprobst ze Pazzaw anhangunden Jnsigeln, der daz durch mein fleizzig pet an den brief gehangen hat, im an allen schaden, der gegeben ist nach Crist gepu^ert drewtzehen hundert Jar, dar nach in dem Newn vnd Sibenczigisten Jar, des Suntags vor Symonis et Jude der Heiligen zwelfpoten.

Source Fulltext: OÖUB 9 (Wien 1906), S. 720-721