ICH Ott der gaülinger purger in der Vreinstat vergich offenleich mit dem bri^ef, Daz ich mit wolbedachtem mu^et vnd nach Rat mei^ener nechsten vnd pesten vreünt zder zeit, do ich es mit recht wol getu^en mo^echt also, daz mein libev hausfrow vrow angnes vnd vnser paider erben fu^erbaz mit einander an chrieg schu^ellen sein vnd dopei ez au^ech beleiben sol an alle widerred, So schaff ich von erst meiner egenanten hausfrovn vi^erczik phunt wienner phenning braits geltes fur ir mo^ergengab also, daz si damit allen iren fru^emen schaffen mag, geben, schaffen, machen, wem si wil an allen i^errsal, Auch schaff ich ir mein haws vnuerchu^embert vncz an iren to^ed, fur ir hei^eretgu^et vnd nach irem tod, so sol ez erben auf vnser paider chind vnd schaff ir als mein petgewant halbs, ez sei chlain oder gro^es, vnd vnser paider chinden halbs. So schaff ich den selben chinden voraws all mein gelt, daz man mir gelten sol, ez sei chlain oder gro^es svnderleich di guter ez sei aygen oder lehen, di hernach geschriben stent: Drew Rewt gelegen enhalb der wenigen gusen in der stifftu^eng in nevnmarkchter pharr vnd zwai lehen, daz ain gelegen zwischen der swantt vnd der Hayd in nevnmarkchter pharr vnd daz ander gelegen pei dem holcz pei der pernaw^o; Do han ich hern Otten dem phaffen drei schilling gelts aufgeschaft all iar also, wand man im drei schilling gelts alswo chauft, so ist daz vorgenant lehen meiner egenanten chind, Vnd ein fleischpanch vnd einen luz in dem purchveld gen sand Peter, vnd meinen phlanczgarten vnd den stadel vnd einen garten, der gelegen ist auf der wür ze zagelaw auf dem phlanczgarten, do leit auff zwainczig phenning vnd auf dem andern garten vi^er vnd zwainczig phenning, vnd zwai Rewt gelegen ze Habru^ek in dem dorff in hyrspekcher pharr. Darzu^e schaff ich in dreizzig phunt wienner phenning, do mir ein hv^eb di ober Hu^eb ze sygleinstorf vnd ein pu^erchrecht ze Lo^esperch in dem dorff fu^er stet, vnd auch schaff ich in die zwainczig phunt phenning, do mir fu^er stent zwen lu^ezz, auf der hamerleytten, vnd einen lu^ez in dem pu^erchveld pei den si^echen zenachst nicleins dez chramer pevnt, Ausgenomen den lu^ez pei der stokchwi^es vnd di wiz darzu^e schaff ich meinem stevffsvn henslein also, daz in mein pruder Herwort sol innehaben, alz ver, vncz daz er vogtper wirt, also, daz er im raichen sol, waz davon becho^emen mag. Darzu^e schaff ich im allen meinen Harnasch also, daz derselb Harnasch pei dem Haws beleiben sol, vncz ob di egenant mein hausfrow einen man na^em, so sol man im jn antwurten, Ez wa^er denn, alz vil, daz in die vrov selb behalten wolt, so sol si im engelten nach erber lewt rat. wa^er awer, daz derselb mein steuffsvn mit dem tod abging, so sol ez erben hinwider auf di geswistret, Mit aufgenomer red schaff ich die pewnt, vnd den luz, der vor gelegen in dem pu^erchveld, ob der angergassen, ze einem iartag, also, daz in mein egenante hausfrow vnd vnser paider chinder schu^ellen innehaben vnd schullen jarleich ein halbs phu^ent phenning darvon geben, daz man den iartag wegee. wa^er awer, daz der selb iartag nicht redleich begangen wu^erd, so sol in der innehaben, der meinez gescheftes mer innehat. Daz in die red also stet vnd vnczebrochen beleib, Darvber gib ich vorgenanter Ott der gaülinger meiner egenanten hausfrovn vnd vnser paider erben den offen brif versigilten mit meinem aygen anhangunden Jnsigil Vnd ze pezzer sicherhait han ich vleizzig gepeten mein genedig herrn die purger zder Vreinstat, daz si der stat Jnsigil an den offen brif gehangen habent ze einer waren vrchünt vnd zeugnuss der sache jn vnd iren erben an schaden. Der brif ist geben nach Christi gepu^erd drevczehen hv^endert iar, darnach in dem Nevn vnd sibenczigisten iar, Dez mitichens vor sand symon vnd juda Tag,

Source Fulltext: OÖUB 9 (Wien 1906), S. 724-725