Wir Kathrei von Haihenpach Techentinn, Vrsula von Topel Chellnerinn vnd gemainlich der Conuennt des frawn chlosters ze Pazzaw, bechennen offenleich mit dem brif. . daz Margret von Hertträwt di emalen het Pawer Hainczlein säligen, vor vnser vnd vor dem erbern man Thoman dem Seiberstorffer di zeit pfleger ze fürstenekk veriehen hat, daz si mit gutleichem willen nach erberr Läut Rat ir Margengab, Leibgeding vnd allew irew recht, die si het auf dem Güt ze Herrträwt, so si daz inne het, redleich ze chauffen geben hat: Chunraten von Öd vnd allen seinen eriben, Vmb ein sölich Gelt, des si sei gännczleich verricht vnd gewert habent: Mit der beschaiden, daz di egenannt Margret von Herrtträwt, weder von ir Morgengab, Leibgeding noch von dhainerlaj anderr irr rechten wegen, hincz dem vorgenannten Güt ze Herrtträwt, aller zugehörung dhain ansprach vnd voderung nymmer mer haben vnd nicht gewinnen schol, weder mit Recht noch an Recht. . Mit vrchund des briefs der besigelt ist nach der egenannten Margreten fleizziger gepet willen mit vnsers Conuenntz anhangundem Jnsigel vns vnd vnserm Goczhaus an allen schaden. der Handlung sind zeugen vnd taidinger gewesen. Görig Üsel, Vlreich Pilich, Mertel Hauczenperger, Anderl von Nidern Perleinsrawt vnd mer erber Läwt. Der brif ist geben an sand Polten Tag: Nach Christ gepurd drewczehen hundert Jar vnd in dem Achczikistem Jar.

Source Fulltext: OÖUB 9 (Wien 1906), S. 876-877