Wir Fridreich von gotez genaden Pfallenczgraf bey Rein vnd Herczog in Bairn zc. Bechennen offenleich mit dem brif, für vns vnd für vnser erben, allen den, di in an sehent oder hörnt lesen, daz wir vnsern liben getrewn, dem Hadmar von Laber vnd dem Gameryt von Särching vnserm diener verschafft haben zwelf Tausent guldein, dacz vnserm liben Öhaim, dem Hochgeporn fürsten Hirczog (!) Albrehten zu Österreich, vnd darumb haben wir in, ein geantwurtt, einen brif, der umb zehen Tausent guldein sagt, von vnserm vorgenanten Öhaim Herczog Albrecht zu Österreich, So hat vns der Haydenreich von Meichsaw vnd der Hanns von Liechtenstain versprochen vmb zway Tausent guldein für vnsern egenanten öhaim Hirtzog (!) Albrehten zu Österreich, Vnd wann vnser vorgenant lib getrew der Hadmar von Laber vnd der Gameryt von Särching, der vorgeschriben zwelf Tausent guldein also gancz vnd gar berichtt vnd bezalt sind an allen gebresten, So sagen wir vnsern vorgenanten öhaim Hirtzog Albrechten zu Österreich vnd sein erben, vnd di egenanten zwen porgen, darumb ze durch slächtt quit ledig vnd los, mit dem brif, Vnd darüber zu einem ürchund vnd zu einer bestätichait, geben wir in den brif versigelten mit vnserm Jnsigel, für vns vnd für alle vnser erben vnd Nachkomen. Daz ist geschehen nach Christez gepürtt drew czehn Hundert Jar vnd in dem achczigistem Jar dez Freytags vor sand Jacobs Tag dez Heiligen Zwelfpoten.

Source Fulltext: OÖUB 9 (Wien 1906), S. 870