Ich Nykla der Wenger mein Hawsfraw vnd alle vnserr eriben — veriehen — Daz wir — verchauft vnd aufgegeben haben vnserm lieben frewnt Andree dem Grünnpekchen seiner Hawsfrawn vnd allen iren eriben — vnserr Swaig die gehaizzen ist auf dem Weppritz gelegen ob alten Jrnik in Jrniger pharr da zu^e den zeiten Michel aufgesezzen ist — vnd die vorgenant Swaig ze lehen ist von den erwirdigen gaistleichen Herren von Gemmikch, die wir vnd vnserr vorvodern in güter gewonhait von alter vnd in lehens gewer herpracht haben — vmb fünf phunt vnd sechczig pfünt allez güter wienner pfenning der wir von in schon gancz vnd gar gericht vnd gewerd sein zü rechten tagen —wir sullen in auch die vorgenante Swaig vnd mit alle dew^e vnd dar zu^e gehört richtig machen mit Herren Hant inner iares vrist vnd ir schermen vnd vertreter vnd veranttwürttär sein an aller der stat wo in dez not vnd dürft geschiecht alz lehens recht ist in dem Lande ze Steyer. — — Vnd haben in daz gelu^ebt bei vnsern trewn an aydes stat allez daz sta^et ze haben vnd ze volfüren, daz oben an dem brief geschriben stet. Vnd waz wir anders gegen in aufhüben daz wär mit chrieg oder mit recht, daz haben wir allez verloren vnd si gancz vnd gar behabt vnd gewu^onnen mit rechtem recht. Daz in daz allez sta^et gancz vnd vnzerbrochen von vns beleib vnd dar u^eber zu^e einem waren vrchu^ende geben wir in den offen brief versigelten mit meins vorgenanten Nykla des Wenger aygen anhangenden Jnsigel vnd dar u^eber zu^e ainer pezzern sicherhait der warhait haben wir gepeten die erbergen Lawt Ekcharden den Prenner zu^e Haws vnd Nykla den Enstaler, die baide ire Jnsigel an den brief gehangen habent durch vnser vleizzigen gepet willen in vnd allen iren eriben an schaden, Dar vnder wir vns verpinden bei vnsern trewen allez daz stät ze haben vnd ze volfüren daz oben an dem brief geschriben stet. Der brief ist geben nach Christi gepürde drewczehen hundert iar vnd darnach in dem Achczigisten iar an sand Vinczenczentag dez heiligen marträr.

Source Fulltext: OÖUB 9 (Wien 1906), S. 859-860